Odne almmuhuvvojit ealgavuorbádeami bohtosat.
396 bivdojoavkku leat dán jagi fárus Finnmárkkuopmodaga (FeFo) ealgabivddu vuorbádeamis.
Dain ožžot 276 bivdojoavkku fálaldaga, ja 120 joavkkus ii leat nu lihkku ja šaddet liigelistui.
Ovcci bivdoguovllu leat rabas, ja sáhttet šaddat eambbo rabas guovllut jus muhtun bivdojoavkkut eai váldde fállon bivdoguovllu.
Obbalaš juolludanlistu biddjo Finnmárkkuopmodaga neahttasiidduide bearjadaga eahkes.
FeFo sádde miessemánu 2. beaivvi bivdojoavkkuide čálalaš fálaldaga bivdojoavkkuide mat ožžo bivdoguovllu. Bivdojoavkkut fertejit dohkkehit fálaldaga ovdal miessemánu 11. beaivvi. Bivdojoavkkuid miellahtut, mat biehttalit váldimis bivdoguovllu, eai sáhte dieđihit sirdima eará bivdojoavkkuide ovdal go 15. bivdobeaivvi.
Liigelisttuin ain vejolašvuohta
Go dohkkehanvuorru lea nohkan, de ožžot liigelisttu joavkkut fálaldaga rabas guovlluide. Dat dieđut bohtet ovdan miessemánu 11. beaivvi.
Liigelisttu bivdojoavkkut ožžot fálaldaga seamma beaivvi ja vástidanáigi lea sullii vahku. Jus bivdoguovllut šaddet rabasin maŋŋil, de fállat daid joavkkuide mat ain leat liigelisttus.
– Liigejuolludeamis sáhttet gili olggobeale bivdojoavkkut ohcat rabas násteguovlluid seamma eavttuiguin go gili siskkobealde joavkkut, lohká meahccehálddašeaddji Anders Aarthun Ims.
Sihkkot jus unnán miellahtut
Dábálaččat sirdet muhtun oassi liigelisttu miellahtut bivdojoavkkuide mat leat ožžon bivdoguovllu.
Ii leat biddjon makkárge rádji galle bivdi sáhttá váldit fárrui, nu guhká go unnimusat njealjis sis geat ledje registrerejuvvon joavkkus ohcamis, ain leat registrerejuvvon miellahttun šiehtadusas.
Bivdojoavku sihkkojuvvo liigelisttus jus bivdojođiheaddji sirdá eará bivdojovkui, dahje jus báhcet unnit go njeallje bivdi, mii lea unnimusgáibádus.
– Lea deaŧalaš ahte bivdojođiheaddji dieđiha čálalaččat jus bivdojoavku ii leat liigelisttus, dadjá Ims.
