– Lea balddahahtti go nu oallugat ain geavahit mobiltelefovnna vuojidettiin, dadjá Ung i trafikken organisašuvnna Liv Marie Bendheim.
Ođđa logut, maid Geaidnopolitiijat leat almmuhan, čájehit ahte dássážii dán jagi leat 275 olbmo Finnmárkkus sáhkkohallan go mobiilatelefovnna geavahit vuojidettiin. Diibmá seamma áigodagas sáhkkohalle 152 olbmo. Ung i trafikken organisašuvdna ii leat duhtavaš loguiguin, go muđui Norggas lea dat lohku njiedjan.
– Lea hui balddihahtti go Finnmárkkus lea lassánan dat lohku, diimmá ektui. Liikká lea buorre oaidnit ahte ollu guovlluin njiedjá lohku vaikko ballat ahte leat stuora sevdnjeslogut maid. Oallugiin lea ain váttis diktit telefovnna orrut vuojidettiin, dadjá Ung i trafikken bargi Liv Marie Bendheim preassadieđáhusas.
Bendheim lohká riskka stuorrut ahte duođalaš lihkuhisvuođat sáhttet dáhpáhuvvat jus olmmoš ii leat áicil johtolagas.
– Mii diehtit ahte juohke goalmmát lihkohisvuohta dáhpáhuvvá danin go ii leat áicil leamaš, ja dávjá lea telefovdnageavaheapmi sorron dasa. Dat lihkohisvuođat eai lean soaitit dáhpáhuvvat jus olbmot eai lean čuoggut telefovnna vuojidettiin.
Dássážii dán jagi leat 18 eambbo olbmo duššan johtolagas, olles diimmá logu ektui.
Jus bissuvvot politiijaide go leat mobiilatelefovnna geavaheame vuojidettiin, de lea sáhkku 7450 ruvnno ja golbma čuoggá. Jus lea ain geahččalanáigodagas, de oažžu guhtta čuoggá.
