-Almmuhus-
-Almmuhus-
OĐĐASAT250 miljovnna eambbo suohkaniidda dusten dihte hástalusaid 

250 miljovnna eambbo suohkaniidda dusten dihte hástalusaid 

-

-

Norggas leat olu stuora hástalusat vuordimis áiggis mii boahtá, ja dusten dihte hástalusaid lasihuvvo 250 miljovnna ruvnno doarjjan suohkaniidda.

– Olles riikka lea gáibideaddji dilis dál, ja mii fertet rehkenastit ahte šaddet eambbo golut dán áigodagas. Oallugat bohtet vásihit lassi deattu buhcciidruovttuin ja ruovttubálvalusain, ja šaddá stuorát dárbu buhtistit eastadan dihte njoammuma. Seammás besset unnánat suohkanbargit bargat iežaset dehálaš barggu. Veahkehan dihte suohkaniid dán váttis dilis, lasihuvvo doarjja suohkaniidda 250 miljovnna ruvnnuin, lohká suohkan- ja ođasmahttinministtar Nikolai Astrup.

Gokčan dihte lassigoluid

Álgovuorus juhkkojuvvo 200 miljovnna suohkaniidda álbmotlogu mielde, ja maŋŋil juhkkojuvvo vel 50 miljovnna. Ruđat galget gokčat lassigoluid mat bohtet koronadávdda dihte. Lea fylkkamánniid ovddasvástádus juohkit árvvoštallandoarjaga daidda suohkaniidda mat dárbbahit dan eanemusat. 

– Dál lea vuos váttis diehtit sihkkarit mo koronadávda boahtá váikkuhit suohkaniid ekonomiijii. Muhtin suohkanat vásihit dál juo ahte dávda váikkuha ekonomiijii ja muhtin suohkanat bohtet easka boahtte jagi dovdat váikkuhusaid, ja lea maid jáhkehahtti ahte muhtin suohkaniidda čuohcá eambbo go eará suohkaniidda. Mii čuovvut dárkilit mielde, ja ii leat veadjemeahttun ahte šaddá dárbu vel eambbo ruđa juohkit suohkaniidda, lohká Astrup.

-Almmuhus-