Seammás go Gonagas Olav jámii ođđajagimánu 17.beaivvi, de šattai Ruvdnoprinsa Harald Norgga ođđa gonagassan. Dál leat ávvudoalut Oslos gos ávvudit ahte lea 25 jagi áigi go monarkiija rievddai ođđa Gonagasain.
Go Gonagas Olav jámii 1991:s lei son 87 jagi boaris ja máilmmi boarráseamos monarka. Ollugat čájehedje doarjaga Gonagasa bearrašii ja bukte ollu liđiid šloahta lusa. Beaivvi maŋŋel, ođđajagimánu 18.beaivvi doalai Gonagas Harald su vuosttaš sártni go lei šaddan monarkan, ja son muittašii iežas áhči ja bivddii doarjaga olbmuin dan doaimma ovddas maid galggai jođihit.
Geassemánus lei Gonagas Harald ja Dronnet Sonja sivdnádallan Gonagassan ja Dronnegin.
Prográmma oanehaččat
Odne lea 25 jagi áigi go Gonagas Harald šattai monarka ja dan áigot dál ávvudit. Ávvudoalut álget odne šloahta kapeallas gos álggos lea ipmilbálvalus ja Ruoŧa ja Danmárkku monarkkat servet lassin Gonagasa bearrašii.
Diibmu 11 rájes 16 rádjái leat dálvestohkosat šloahta olggobealde ja Gonagasbearáš searvá dáidda doaluide.
Feastačájálmas álgá Universitehtas mii lea ráđđehusa ávvuskeaŋka Gonagaspára 25 jagi ávvudoaluin, čállá Gonagaslaš šloahtta neahttasiiddus.
