Ovtta biilavuoddjis lei nu leahtu ahte massii biilavuodjenkoartta.
Finnmárkku politiijat dieđihit ahte čađahedje leahttobearráigeahču golmma gielddas ikte, borgemánu 10. beaivvi.
Johtolatpolitiijat bissehedje muhtin biilavuoddji gaskal Leavnnja ja Iŋggášguolbana, Porsáŋggu gielddas. Son vujii 145 kilomehtera diimmus ja massii biilavuodjenkoartta. Báikkis lei leaktomearri 80 kilomehtera diimmus.
Porsáŋggus sáhkohalle maid 10 biilavuoddji go johtolatpolitiijat čađahedje leaktobearráigeahču Čuđegiettis. Báikkis lea leaktomearri 60 kilomehtera diimmus. Alimus leaktu mii mihtiduvvui lei 77 kilomehtera diimmus.
Sáttováris, Unjárgga gielddas, ges sáhkohalle njeallje biilavuoddji. Báikkis lea leaktomearri 80 kilomehtera diimmus. Alimus leaktu mii mihtiduvvui lei 108 kilomehtera diimmus.
Mátta-Várjjat gielddas ges čađahuvvui leahttobearráigeahčču Goađáhis. Báikkis lea leahttomearri 40 kilomehtera diimmus. Oktiibuot gávcci biilavuoddji sáhkohalle.
