– Mun dadjen ahte 2006 OG lei mu maŋemus oassálastin, muhto mii čállit fargga 2017 ja mun lean ain doaimmas. Lea somás bargu, ja sáhtán eallit iežan buđaldemiin, muitala Håvard Klemetsen.
– Mun dadjen ahte 2006 OG lei mu maŋemus oassálastin, muhto mii čállit fargga 2017 ja mun lean ain doaimmas. Lea somás bargu, ja sáhtán eallit iežan buđaldemiin, muitala Håvard Klemetsen.
Go lei ságastallan Tor Arne Hetlanddain, šattai lotnolasvaláštallis Håvard Klemetsenis miella guhkit áiggi leat mielde lotnolasvalástallamis.
Klemetsen deavdá 38 jagi boahtte jagi álggus, sullii mánu ovdal čuoigan-MM mat leat Lahtis Suomas.
Dál lea álgán jurddašallat OG:i searvat, go son lea 39-jahkásaš.
OG geasuha
Son ii dieđe galgá go gohčodit lotnolasvaláštallama bargun, go son liiko nu bures leat njuikehagas ja čuoigamis.
– Hupmen moadde vahkku áigi Tor Arne Hetlanddain. Son lei leamašan Lulli-Koreas OG-iskkadeamis. Moai humaime láhttoprofiilla birra. Dat hástala mu, go heive munnje hui bures, muitala Klemetsen NTB:i.
Váttis moarsi haga
Dán dálvvi bargá Lahti MM-gilvvuid guvlui.
– Lean šaddan bajás Guovdageainnus. Báiki mii lea njeallje miilla eret Suomas, ja mu moarsi lea bealle suopmelaš. Mus leat ollu buorit muittut Suomas, muitala Klemetsen.
– Lean Lahtis vuoitán buot eanemus gilvvuid. Ollugat ballet biekkas doppe. Mun lean hui gievra diekkár diliin. Luohkká lea gáibideaddji ja lossat njuiket. Dalle lea buorre go lea buorre fysihkka njuikehagas. Mun njuiken mehterbeali badjelii go earát, muitala Klemetsen geas leat MM-medáljat viđa gilvvuin.
– Jus in livčče jáhkkán ahte šaddet eanet medáljat, de livččen heaitán. Ferte ollu vuoruhit eret. Mus lea buorre eallin, lean dearvvaš ja falli, ja leat árgabeaivvit main oaččun ollu. Lea lossat leat guovtti máná áhčči ja bargat valáštallamiin bajimus dásis. Mun jáhkán buohkat rahčet dan dilis, ja moarsi lea maid ovttaoaivilis strategiijain ja vuoruhemiin. Ii livčče leamaš vejolaš čađahit ná su haga, muitala Klemetsen giitevaččat.
Álo medállja mielde ruoktot
Medáljaid lea vuoitán sihke OG:s ja MM-gilvvuin 2011:s, 2013:s, 2014:s ja 2015:s.
– In leat guhkes áigái boahtán ruoktot nu ahte ii leat medállja. Jus beasan MM-jovkui, de leat stuora vejolašvuođat ahte vuoitit eanet medáljaid. Mun niegadan individuála medálja birra, muitala Klemetsen gii šattai 12:din máilmmicupas mannan dálvvi.
Háliida leat eanet mánáid fárus
– Olmmoš jurddaša eará ládje go dalle go lei 18 jagi boaris. In jáhke bargat nu guhká go Noriaki Kasai (44) ja Ole Einar Bjørndalen (42). Mus leat guokte unnoračča ruovttus geaid háliidivččen dávjjit oaidnit. Háliidan eanet mánáid bajásgeassimis mielde. Lotnolasvaláštallan ii leat hirbmat lukratiiva valáštallan. Álggos geahččat dál MM-áigodaga, muhto ii ábut goassege dadjat ahte ii šatta eanet, boagusta Klemetsen.
Sus leat lagas čanastagat Supmii.
Juohke jagi searvá son Sámi Ski Racii mii manná Guovdageainnu ja Heahtá gaskka.
– Máhtán hui unnán suomagiela. Máhtán sámegiela buorebut, muhto gehččen ollu suomagiel TV go ledjen unni. Mis lei YLE 1, 2 ja 3, ja dušše NRK. Mis ledje eanet Suoma kanálat ruovttus go Norgga kanálat. Lean ollu hárjehallan Roavvenjárggas, ja láviimet mannat gávppašanmátkái Supmii. Dat lei hálbbit, ja devddiimet galmmihanskábiid eará gálvvuiguin go báikkálaš rámbuvrra gálvvuiguin, muittaša Klemetsen.
(©NTB)
