Mediain leat sullii 200 miljovnna ruvnno sisaboahtu njiedjan reklámadietnasis mannan jagi.
2018:s njidje nationála TV- ja rádioaktevrrais reklámasisaboađut. Dat boahtá ovdan Mediabearráigeahču jahkásaš ekonomiijaraporttas.
– Sáttamediat vásihit dál dan seamma go aviisasuorgi lea vásihan, ahte almmuheaddjit sirdet investeremiid eará kanálaide, lohká Mediabearráigeahču direktevra Mari Velsand preassadieđáhusas.
Google ja Facebook váldán
Aviisasuorgi lea maŋemus viđa jagis manahan 2,3 miljárdda ruvnno almmuhusdietnasis, ja lea erenoamážit Google ja Facebook váldán stuora oasi dietnasis. TV- ja rádioaktevrrain lassánii sisaboahtu 2017:s, muhto diibmá njiejai fas dienas.
– TV- ja rádioi ii leat nu garrasit čuohcan globála aktevrraid gilvu oččodit Norgga reklámasisaboađu. Easka 2018:s álgá sisaboahtu almmuhemiin njiedjat TV- ja radiosuorggis.
Mákset eanet sisdoalu ovddas
Vaikko almmuhemiid sisaboahtu njiejai, de lassánii ollislaš sisaboahtu diibmá. Sivvan lea go geavaheaddjit lassánedje diibmá, boahtá ovdan raporttas maid Mediabearráigeahčču lea almmuhan. Nationála TV-kanálaid dienas lea viđa jagis duppalastojuvvon go ožžot eanet miellahtuid geat ostet Premium-sisdoalu.