200 bohccooivviin čalmmustahttá vieljas dili

Odne álgá Sis-Finnmárkku diggegottis ášši go Jovsset Ánte Sara čuoččuha ahte stádas ii leat riekti unnidit su siidaoasi boazologu 75 heggii. Sara čuoččuhus lea ahte Eanandoallo- ja biebmodepartemeantta cuoŋománu 10. beaivvi mearrádus galgá fámuhuvvat.

Oabbá čalmmustahttá dáidagiin

Čuohtemehtera eret Sis-Finnmárkku diggegotti lea Jovsset Ánte Sara oabbá ja dáiddár Máret Ánne Sara ceggen oasi čájáhusas «Pile o´ Sápmi» , masa lea bardán sullii guoktečuođi bohccooaivvi čalmmustahttit ášši mii dál lea Sis-Finnmárkku diggevisttis meannudeamis.

– Lea hui čielgga buohtastahttin «Pile o´ Bones» historjái mii dáhpáhuvai Kanadas 1800 loahpageahčen go eurohpalaččat njuvve measta 50 miljovnna buffalo ja barde oivviid stuorra várrin, troféavárrin ja gohčodedje dan «Reginan». Guovllu olbmot gohčodit ain dan «Pile o´ Bones», lea várra morašnamma sin bealis, čilge Máret Ánne Sara.

Suorganii 

Son muitala iežas veaháš suorganan go bargagođii «Pile o´ Sápmi» čájáhusain, ja fuomášahtii paraleallaid.

– 1800-logus lei strategiija jávkadahttit buffaloid maiguin olbmot elle, ja dál lea ollu mii dáhpáhuvvá boazodoalus, gižžu guohtoneatnamiid alde, seammás go bákkuin álggahedje unnidanproseassa mii rievtti mielde bisseha rekruterema boazodollui. Go nu čielgasit fallehit nuoraid geat leat aiddo álgán eai ge leat ollu bohccot, de nuorat čuolddastuvvojit eret go leat nu rašes dilis. Dan dihtii šattai mu mielas nu ilgadin, ja «Pile o´ Sápmi» lei hui garra dáiddabargu, muitala dáiddár Máret Ánne Sara.

Tiibmu guđas odne eahkes lea «Pile o´ Sápmi» almmolaš rahpan Deanu šalddis. Ovcci sámi dáiddára leat gieđahallan ja bargan iešguđet fáttáin, nu go sámi rievttit, psyhkalaš dearvvašvuohta ja fikšuvdnafilmmat mat gieđahallet bággonjuovvamiid.

– Mii leat háliidan čalmmustahttit ášši viidodaga, ja čiekŋudit veahá mii ja mo lea váikkuhan olbmuid, muitala Máret Ánne Sara.