-Almmuhus-
OĐĐASAT200-300 olbmo erremis: – Vurdet korona vel eambbo lassánit

200-300 olbmo erremis: – Vurdet korona vel eambbo lassánit

-

-

Álttás barget garrasit oažžut ollislašgova covid-19-leavvamis.

Gaskavahkku lei Álttá suohkana heahtejoavku čoahkkanan digaštallat movt galget gieđahallat koronaleavvama dáid lagamus beivviid. Sátnejođiheaddji Monica Nielsen muitala eahpečielga dili birra.

– Mis leat dál 12 olbmo geain lea duođaštuvvon korona. Ovcci olbmo ožžo positiiva iskosa ikte, guokte sotnabeaivvi ja okta mannan vahkku. Sis, geat ikte ožžo duođaštuvvon korona, lea čanastat sidjiide geat sotnabeaivvi ožžo duođaštuvvot. Dál lea 200-300 olbmo erremis, dieđiha Nielsen.

Vurdet lassáneami

Vearrámus boađus Nielsena dieđuid mielde lea ahte boahtá mearkkašahtti eambbo lassáneapmi.

– Mii vuordit eambbo positiiva iskosiid, muitala Nielsen.

Son muittuha olbmuid vuhtii váldit njoammuneastadannjuolggadusaid.

– Dál lea duođalaš dilli, hui duođalaš. Lea dehálaš ahte mii buohkat čuovvut njuolggadusaid, ráddjet sosiála oktavuođaid ja lagasoktavuođaid, vai veahkehit geahpedit njoammuma. Dál mii fertet veahkkálagaid bargat. Dat ii leat sávahahtti dilli, muhto dárbbašlaš.

Eahpečielga dilli

Positiiva iskosat, mat disdaga bohte, dagahedje eambbo olbmuid erremii. Sis lea ollugat geat galget odne gaskavahkku ja ihttin váldit iskosiid. Nielsen lohká suohkanváldodoaktáriid ja njoammunguorranbargiid bargat garrasit kártet dili.

– Dál lea eahpečielga dilli dan ládje ahte mii ahte dieđe gos njoammun boahtá. Sidjiide lea njommon Álttás korona, diehtit ahte ii boađe eará sajiin, ovdamearkka dihte Hámmárfeasttas, lohká Nielsen. 

– Buohkat lea buori dilis. Muhtumiin leat dávdamearkat, muhto ii leat gal nu vearrái ahte leat dárbbašan buohccevissui.

Sáhttet čavget

Suohkanváldodoaktárat galget árvvoštallat lea go dárbu čavget njoammundoaibmabijuid.

– Mii leat bovden ovdagotti earenoamáš čoahkkimii, gos muitalit dili birra ja vejolaš doaibmabijuid. Sáhttet boahtit báikkálaš doaibmabijut, dadjá Nielsen.

Vuođđoskuvllat ja mánáidgárddit leat rabas, ja Nielsena dieđuid lea ráđđehus gohččon ahte mánáid ja nuoraid galget váldit vuhtii eanemus lági mielde.

Váldán oktavuođa

Nielsen ii loga sis dieđuid leat go čanastagat eará suohkaniidda. 

– Leat sii geain váldo iskkus, geat ožžot dieđu leat go positiivvat. Mun lean maiddái váldán oktavuođa ránnjásuohkaniid sátnejođiheddjiiguin, gosa oahppit leat gullevaččat, ja dieđihan sidijiide min dili birra. Mis leat ollu olbmot eará suohkaniin, sihke ealáhuseallimis, joatkkaskuvllas ja universitehtas, muitala Nielsen.

-Almmuhus-