-Almmuhus-
KULTUVRA20 000 ruvdnosaš stipeanda sámi kulturguoddái

20 000 ruvdnosaš stipeanda sámi kulturguoddái

-

-

– Stuora gudni, lean nu giitevaš ja dovddan iežan gudnejahttojuvvon go dát stipeanda geigejuvvo munnje, dadjá son.

Kaija Anstensena muitofoandda vuođđudus lea juolludan dán jagáš stipeandda Sara Ajnnakii.

 

Sara Ajnnak govvida iežas sámi artistan, komponistan, juoigin, dáiddárin, kulturguoddi, eadneolmmožin, boazodoallin, aktivistan ja humanistan.

 

Sara lea máhccan fas fárrolaga mánáidiinnis sámi gillii ja dovdá ovddasvástádusa iežas musihkain veahkehit earáid máhccat ruovttoluotta iežaset kultuvrraide. Son áigu maid iežas musihkain, luđiin, dáidagiin ja installašuvnnaiguin fárrolaga eará kulturguddiiguin ja dáiddáriiguin manifesteret iežas vuostehágu Sámi guovlluid ávkkástallamii. 

Son lea eambbo ja eambbo maŋemus jagiid áŋgiruššan Ruoŧa musihkkamáilmmis ja lea dán jagi almmuhan iežas skearru. Jurdda lea mátkkoštit olggobealde Sámi boahtte jagi vai olaha eambbo olbmuid.

 

Stuora gudni

Dát stipeanda geigejuvvo sutnje čájehan dihte ahte su bargu lea dohkkehuvvon ja vai movttiidahttá su joatkit dainna bargguin sámi rivttiid ovddas. Stipeanda lea 20 000 ruvnno.

– Stuora gudni, lean nu giitevaš ja dovddan iežan gudnejahttojuvvon go dát stipeanda geigejuvvo munnje. Artistan, komponistan ja teakstačállin barggan mun olu okto, dákkár stipeanda mu barggu ovddas inspirere. Dál váldá vuovdnás kulturbargi dán stipeandda mielde boahtte jahkái ja álggán fas ođđa fámuiguin, dadjá Sara Ajnnak preassadieđáhusas.

 

Bohtet eambbo vejolašvuođat

Nu go juohke jagi, de bohtet olu ohcamat, ja livčče áinnas galgan eambbosat go dušše okta geasa geigejuvvo. Kaija Anstensena muitofoanda muittuha ahte bohtet fas ođđa vejolašvuođat ohcat boahttevaš jagiid.

-Almmuhus-