Finnmark Rein njuovahagas Guovdageainnus, lea viehkat olles mannan čavčča čájehan 1,4 kilo menddo unnán juohke gorudis. Njuovahat lea šaddan máksit boazodolliide dán ovddas, ja mieđihit olu ruđas leat sáhka.
Finnmark Rein njuovahagas Guovdageainnus, lea viehkat olles mannan čavčča čájehan 1,4 kilo menddo unnán juohke gorudis. Njuovahat lea šaddan máksit boazodolliide dán ovddas, ja mieđihit olu ruđas leat sáhka.
Go boazoeaiggádat moaitigohte Finnmark Rein boazonjuovahaga Guovdageainnus ahte sin gávpebohccuid njuovvandeattut eai doallan deaivása, de njuovahat iskagođii ášši ja gávnnahii ahte sii leat bargan boastut.
Boazoeaiggádat moaitigohte
Njuovahat gohččojuvvui váldit atnui ođđa vihkkenvuogádaga mannan čavčča, gohčoduvvon «MEATS», de dat gesii eret 1,4 kilo juohke gorudis maid oste boazoeaiggádiin. Roahkki, masa njuovahagas heŋgejit gorudiid, deaddá 1,4 kilo, ja go dan deattu gesse eret, de goitge vuogádat gesii eret vel 1,4 kilo, vaikko nu ii galgga vejolaš.
Finnmark Rein assisteantadirektevra Johan Mathis Buljo čilge sii ožžo čakčat moaitámušaid boazoeaiggádiin ahte gávpebohccuid deattut eai oro doallame deaivása.
– Álo, go mii váldit atnui ođđa vuogádagaid, de mii hui dárkilit iskat ahte buot galgá doaibmat riekta. Dat mii dás lea geavvan lea ahte go heŋgiimet gorudiid rohkiide, de dat vuogádat gesii juo automáhtalaččat eret dan 1,4 kilo, maid eat diehtán ja nu gesiimet eret 1,4 kilo, muitala Buljo.
Buohtastahtte
Buljo muitala sii go ain eanet boazoeaiggádat bukte moaitámušaid, de álge sii guorahallat veavtta, mii dieđusge ii čájehan vearrut.
– Mii buohtastahttigođiimet Kárášjoga njuovahagain ja oinniimet erohusa, nu movt jávkoproseantta ii doallan deaivása, go gorudiin Guovdageainnus lei dat beare vuollin.
Máksán juo boazoeaiggádiidda
Go Finnmark Rein fuomášii boasttuvuođa vuogádagas, de leat sii ráhkadan ođđa rehkegiid boazoeaiggádiidda.
– Mii leat njuovvan 20 000 bohcco Guovdageainnus ja das lea oalle ollu ruđas sáhka. Mii leat juo mannan vahkku máksán eanaš boazoeaiggádiidda, ja otná beaivvi mielde galget buohkat oažžot mávssu, lohká Buljo.
Ávvira rehketbihttá mielde sáhttá Finnmark Rein šaddan máksit lagabui 1,5 miljovnna ruvnnu ruovttoluotta boazoeaiggádiidda.
Mii leat rehkenastán sin biergohattiid gaskamearálaš hatti, mii šaddá 52,6 ruvnnu kilos. Jus Finnmark Rein AS lea 20 000 bohcco vihkken boastut 1,4 kilo unnit, de dat gártá 28 000 kilo. 52,6 geardde 28 000 kilo lea de lagabui 1,5 miljovnna ruvnno.
Buoridan rutiinnaid
Buljo ii loga vearrámussan ahte máksu maŋŋonii, go dat ruhta gulai goitge boazoeaiggádiidda, muhto dat go šattai vearrut álgoálggus.
– Dat lea beare heittot min bealis, ja mii leatge dál guorahallan iežamet rutiinnaid ja buoridan daid, nu ahte buot galgá riekta.
