Oktiibuot ovcci olbmo leat duššan johtaluslihkohisvuođain suoidnemánus. Møre ja Romsdal fylkkas ja Nordlándda fylkkas lea okta duššan, Oslos ja Vikenis leat guovttis duššan ja Innlánddas ges golmmas duššan. Oktiibuot leat Romssas ja Finnmárkkus duššan golbma olbmo johtaluslihkohisvuođas.
18 olbmo leat duššan geassemánus ja suoidnemánus, 11:s dain ledje mohtorsihkkelvuoddjit. Dan 11 lihkohisvuođas dušše čieža olbmo go vudje badjel luotta ja guovttis duššaiga go beaškkeheigga oktii fievrruin mii bođii ovddal.
– Dat logut leat hui balddihahttit, lohká Stáhta geaidnodoaimmahaga johtalussihkarvuođa ossodatdirektevra Guro Ranes.
Gaskamearálaš ahki lea allat dain geat dušše: ovccis dan 11 olbmos geat dušše leat 40–59-jahkásaččat. Geaidnodoaimmahaga lihkohisvuođaanaliisajoavku galgá analyseret buot lihkohisvuođaid, vai nagodit kártet sivaid ja oktavuođaid.
– Lea beare árrat lohkat mii lihkohisvuođaide lea sivva, dahje lea go dat treanda, lohká Ranes, mii deattuha man dehálaš dat lea geaidnodoaimmahahkii doallat dan buori ovttasbarggu mohtorsihkkeliid beroštusorganisašuvnnain.
