Suoidnemánus heavvanedje 18 olbmo Norggas. Dá leat okta eanet go diibmá seamma mánus.
Oktiibuot heavvanedje 14 dievddu, guokte nissona ja guokte máná suoidnemánus, čájehit Gádjunsearvvi logut.
– Oallugat geasuhuvvojit čáhcái ja sáttogáttiide geasseluomus ja erenomážit go leat báhkat. Dađibahábut lassánit dalle lihkohisvuođat main olbmot duššet, lohká Gádjunsearvvi heavvaneami fágasuorggi jođiheaddji Tanja Krannes preassadieđáhusas.
Fanaslihkohisvuođat
Čiežas heavvanedje fanaslihkohisvuođain, guđas dáin gahčče fatnasis ja čihččet heavvanii danin go geahččalii oažžut fatnasa gáddái mii lei rievdamin fávlái.
Dát leat buohkat dievdoolbmot.
Njealjis ges jápme go ledje vuojadeamen. Sakka unnit dušše vuojadettiin diimmá ektui.
Dalle heavvanedje 14 olbmo go ledje vuojadeamen.
55 heavvanan dán jagi
Dássážii leat oktiibuot 55 olbmo heavvanan dán jagi.
Diibmá ledje 69 olbmo heavvanan dán muttos áigge.
90 proseantta sis geat heavvanit leat dievdoolbmot.
Lihkohisvuođain duššet dávjjimusat nuorra gánddat, nuorra dievddut ja dievdoolbmot badjel 40 jagi.
