Gihttela gielddas, gosa Levi gullá, leat duođaštuvvon buot eanemus koronavirusa njoammuma Davvi-Suomas.
Oktiibuot 17 olbmos lea duođastuvvon korona Gihttela gielddas mánnodaga, muitala Gihttela gieldda váldodoavttir Heidi Tanninen Yle artihkkalis.
Gihttela gielddas orrot oktiibuot 6500 olbmo ja gielddas lea dál eanemus njoammun ássiidlogu ektui Davvi-Suomas, eanet go Suoma oaivegávpogis Helssegis.
Turisma čilgehussan
Sivva koronanjoammumii sáhttá leat guovllu turisma, dadjá Lappi guovddášbuohcceviesu infekšuvdnadoavttir Markku Broas Yleii. Sihke turisttat ja turismabargit leat njoammuduvvon.
– Gihttelis lea epidemiija muhtin lohkui. Turisma lea jáhkkimis sivva dasa. Gihttelis leat stuora fitnodagat, main lea riikkaidgaskasaš doaibma ja turisma lea dál bajimužžan dás, dadjá Lappi guovddášbuohcceviesu infekšuvdnadoavttir Markku Broas.
Korona lea maid gávdnon Roavvenjárggas, Kolaris ja Kemis. Oktiibuot lea Suomas dávda njommon 2 308 olbmui ja 28 leat jápmán korona dávdii Suoma dervvašvuođainstituhta THL loguid mielde.
