15 sámi dáiddáris lea oktasaš čájáhus Norgga grafihkkáriid 100-jagi ávvudeamis. Čájáhusa namma lea «Conventus» ja lea ávvujagi finálačájáhus.
Čájáhus «Conventus» čájeha girjáivuođa iešguđetge grafihkalaš dovddahemiin ja deaddilanteknihkain sihke árbevirolaš vugiin gitta ođđahutkosaš formáhtaide. Čájáhusas leat dáidagat luoikkahuvvon Sámi dáiddamagasiinnas/RiddoDuottarMuseain, Saviomuseas ja dáiddáriin. Čájáhus galgá čájehit dan viidodaga mo guovddáš sámi dáiddárat leat bargan iešguđetge grafihkalaš teknihkain. Čájáhus lágiduvvo juovlamánu 12. beaivvi Norske Grafikere nammasaš báikkis Tollbugatas, Oslos.
Sámi dáiddárat geaid dáidagat čájehuvvojit
John Savio (1902-1938), Oddmund Kristiansen (1920-1998), Iver Jåks (1932-2007), Inga Nordsletta Pedersen (1932), Trygve Lund Guttormsen (1933-2012), Aage Gaup (1943), Hans Ragnar Mathisen (1945), Arnold Johansen (1953), Eva Aira (1957), Tomas Colbengtson (1957), Lena Stenberg (1961), Kristin Tårnesvik (1964), Katarina Pirak Sikku (1965), Geir Tore Holm (1966) ja Ragna Misvær Grønstad (1984).
