Mánnodaga váldigohte iskosiid Oslos, main oažžu diehtit sullii ovtta kvárttas lea go korona njommon.
Dál, go Aker iskkusstašuvnnas geahččališgohtet daid ođđa iskosiid, de boahtá vástádus 15-20 minuhtas.
– Iskosiid váldet seamma ládje go dábálaš iskosa, čoddagis ja njunneráiggis, lohká dearvvašvuođadirektevra Espen Nakstad NTB:i.
Ii ádján
Dan ovdii go iskkussákki sáddet laboratoriai analysaide, de deaddeluvvojit reagenbohccei ja analyserejit dan iskkusstašuvnnas.
– Ádjána birrasii 15 gitta 20 minuhta ovdal go oažžu vástádusa, lohká Nakstad.
4000 iskosa galget váldit, earret eará gávnnahit leat go jođánis iskosat seamma buorit go laboratoriaiskosat. Nakstad lohká ahte jus lea dávda njommon dutnje nu ahte lea positiiva iskkus, de lea vástádus seamma sihkar dainna iskanvugiin.
– Dalle lea jearaldat galle buohcci dat iskkus gávdná. Dábálaš iskosiin leat birrasii 90 proseantta. Jođánisiskosiin jáhkket logu leat vuollelis, muhto mii eat leat áibbas sihkkarat. Dan áigut mii kártet dál, lohká Nakstad.
Geahččalanortnet
Guokte vahkku galget geahččalit dan ortnega go váldet dábálaš koronaiskosa, de váldet jođánisiskosa vel jus háliidit. Leat Dearvvašvuođadirektoráhtta, Álbmotdearvvašvuođainstituhtta ja Oslo suohkan mat leat geahččaleame ođđa ortnega.
Dearvvašvuođadirektoráhtta dieđiha ahte jus jođánisiskosat doibmet bures, de sáhttet dat leat dehálaččat vai ožžot buorebut birgejit pandemiijain. De sáhttá jođánit gávdnat geasa lea dávda njommon, ja sáhttá álggahit njoammunguorrama ja njoammuneastadandoaimmaid. (©NTB)
