Davvi Girji AS lea ožžon badjel 1,5 miljovnna ruvnnu sámediggeráđis buvttadit giellamovttiidahtti pedagogalaš materiálaid mánáidgárddiide. Buktagat ráhkaduvvojit golmma sámegillii.
Davvi Girji AS Kárášjogas áigu ráhkadit pedagogalaš materiála mánáidgárddiide mat galget ovdánahttit ja bisuhit mánáid giela ja movttiidahttit mánáidgárdemánáid geavahit sámegiela árgabeaivvis.
Materiála galgá ráhkaduvvot sihke lulli-, julev- ja davvisámegillii.
– Go sámi mánáid lohku mánáidgárddiin lassána, de lea dehálaš ahte mii čuovvolit dán doarjagiin sámi pedagogalaš materiálaide mánáidgárddiide, dadjá sámediggeráđđi Mikkel Eskil Mikkelsen (NSR).
Spealut, hoahkamat ja lávlagat
Doarjja galgá earret eará geavahuvvot ráhkadit guokte spealu, giellabussiid ja lávlladoasa.
Spealut leat heivehuvvon gávcci jahkodahkii, ja dáiguin galget ovdánahttit mánáid giellamáhtu. Giellabussiin galget leat sihke konkrehtat, hoahkamat ja doahpagat mat maiddái leat heivehuvvon iešguđetge jahkodagaide. Jagi áiggit leat maid fáddán lávlladoasa luđiin ja lávlagiin.
– Háliidan sávvat lihku bargui, ja vuorddán iluin oaidnit gárvves pedagogalaš materiála, dadjá Mikkelsen.
Sámediggeráđđi juolluda Davvi Girjái 1 540 000 ruvnnu doarjjaortnegis «Doarjja ovdánahttit pedagogalaš ávdnasiid mánáidgárddiide». Doarjjaortnega mihttomearri lea ahte mánáidgárddiide, mánáidgárdeoahpaheddjiide ja oahpahusásahusaide galgá leat álki fidnet pedagogalaš ávdnasiid main lea sámi sisdoallu sámegielaide.
