Stáhta Luonddubearráigeahčču ávžžuha olbmuid geat oidnet albasa oktan čivggain dahje gávdnet luottaid daid maŋis, dieđihit dalán Stáhta Luonddubearráigehččui guovvamánus. Jus dieđut eai ovdal leat registrerejuvvon, de sáhtát tinet 15 000 kruvnna guovvamánus.
– Jus oainnát olu albasiid oktanaga dahje jus oainnát ahte olu albasat leat vázzán das seamma áiggi, dieđit Stáhta Luonddubearráigehččui vai Stáhta Luonddubearráigeahčču beassá dieđuid registreret. Jus Stáhta Luonddubearráigeahčču sáhttá dieđu duođaštit luoddaguorrama bokte, de máksá Boraspirelávdegoddi 15 000 kruvnna jus dat leat ođđa dieđut, eaige ovdal registrerejuvvon albbasbearašjoavkun. Jus lea ovdal registrerejuvvon, de lea máksu 5000 kruvnna. Das gesso dieđusge vearru, ávžžuha Finnmárkku guovllu boraspire fágaovddasvástideaddji boraspireduođaštanossodaga seniorneavvu Magne Asheim preassadieđáhusas.
Dárbbaša veahkki
Finnmárkku guovllu boraspire fágaovddasvástideaddji boraspireduođaštanossodaga seniorneavvu Magne Asheim muitala SNO dahje Stáhta Luonddubearráigeahčču registrere albbasbearrašiid guovvamánu lohppii, go albasiid gieibmanáigi álgá njukčamánus.
– Albasat ellet eanaš okto, spiehkastat leat njiŋŋelas albbas mas leat čivggat. Daid gohčodat mii bearašjoavkun go dat johtet ovttas dan rájes go albasčivggat riegádit birrasii miessemánu loahpas gitta njukčamánnui maŋit jagi. Dat mearkkaša ahte jus mii gávdnat luottaid dahje oaidnit olu albasiid fárrolaga johtimin, de lea stuorra vejolašvuohta ahte lea bearašjoavku, čilge Asheim.
Stáhta Luonddubearráigeahčču registrere jahkásaččat albbasbearašjoavkkuid vákšun dihtii albbasnáli.
Ii oktage albbas oidnon dán dálvvi
Magne Asheim muitala sii dán dálvvi eai leat gávdnan, eai ge duođaštan ovttage albbas bearraša Finnmárkkus.
– Dál lea váile guokte vahku velá guovvamánus ja lea hoahppu. Mii leat sorjavaččat oažžut cavgilemiid olbmuin geat johtet mehciin, jus galgat nagodit duođaštit albbas bearrašiid. Dás livčče vejolašvuohta tinet ruđa jus diehtá gos albasat leat fylkkas. Dat ortnet leamaš mis máŋga jagi, maiddái Tromssas. Soitet leat olbmot geat johtet mehciin geat eai leat gullan dán ortnega birra, čilge Asheim.
Jahkásaččat duođaštuvvo ahte albbas lea goddán 50 bohcco ja sávzza Finnmárkkus, muhto dán dálvvi lea albasat goddán olu bohccuid, erenoamážit Porsáŋggus. Dan sivas go Finnmárkku albasnális leamaš vuollel njeallje čivgama, de ii leat rahppon albbasbivdu Finnmárkkus.
ROVDATA neahttasiiddus sáhttá eambbo albasa ja albbasvahágiid birra Finnmárkkus lohkat: www.rovbase.no, Makkár albbasluottat leat, gávdná dás: http://www.miljodirektoratet.no/no/Publikasjoner/Publikasjoner-fra-DirNat/Brosjyrer/Spor-og-tegn/
Dieđuid sáhttá sáddet báikkálaš Stáhta Luonddubearráigeahččui dahje SNO dahje mobilappain:
