Basiidáigge olbmot vánddardit barttaide, meahccái ja muohtamáilbmái. Muhto seammás lassána buollinvárra, ja iskosat čájehit ahte 15 000 barttas váilu buollinčáskadanrusttet.
Basiidáigge olbmot vánddardit barttaide, meahccái ja muohtamáilbmái. Muhto seammás lassána buollinvárra, ja iskosat čájehit ahte 15 000 barttas váilu buollinčáskadanrusttet.
– Jus barta buollá, de lea measta iežas duohken čáskadit dola. Sáhttá ádjánit dassážii go buollinčáskadeaddjit ollejit báikái, ja danne lea dehálaš ahte barttas lea čáskadanapparáhtta, lohká Øyvind Setnes, Tryg Forsikring dáhkádusfitnodagas.
Dan dieđiha Tryg Forsikring preassadieđáhusas.
1000 bartta bullet
Barttain ja astoáigeviesuin leat seamma gáibádusat go eará viesuin ge, ahte galgá čáskadanrusttet ja suovvanjurggon.
Liikká bullet birrasii 1000 astoáigeviesu dahje bartta juohke jagi Norggas. Logut čájehit ahte juovlamánnu lea okta dain vearrámus mánuin.
Norgga buollinčáskadansearvi ja Tryg Forsikring čađahedje diibmá iskkadeami, mas gávnnahedje ahte 15 000 barttas ii leat čáskkadanrusttet, ja 8 000 barttas ii leat suovvanjurggon.
– Jus eambbosat válddáše buollinsihkarvuođa duođas, de eai livčče liikká olu buollimat. Dađi bahábut leat buot eanemus buollimat, main olmmoš lea sivvan, juovlamánus, lohká Setnes.
Ávžžuha iskat
Preassadieđáhusas rávve dahkat dáhpin juo iskat suovvanjurggona juohke háve go olle bartii, álo fievrredit batteriijaid mielde ja dárkkistit ahte čáskadanrusttet lea sadjosis.
Rávve maid vurket GPS-koordináhtaid, vai lea earáide álkit deaivat báikái jus fal buollá.
