Lohku lea lassánan njeljjiin olbmuin diimmá ektui.
Maŋemuš jagiid leat jápminlihkohisvuođat johtolagas niedjan, muhto dán jagi lea lohku baicce lassánan.
Diibmá dáid muttuid dušše 45 olbmo johtolatlihkohisvuođain ja dán jahkái lea dát lohku lassánan guvttiin olbmuin.
– Jus galgat oažžut dáid loguid njiedjat, de fertejit olu doaimmat biddjojuvvot johtui. Leahttu ferte vuoliduvvot, biilaboagán ferte biddjot ja vuoddjit fertejit čuovvut mielde johtolagas. Eanas johtolatlihkohisvuođat gevvet olmmošlaš boasttuvuođaid geažil, lohká Trygg Trafikk gulahallanhoavda, Ann-Kathrin Årøen.
Norggas sihkkaremos johtolat
Lea goalmmát jahki go Norgga johtolat válljejuvvo máilmmi sihkkareamosin.
Eai ovttage eará riikkas Eurohpás leat ná jođánit niedjan jápminlihkohisvuođat johtolagas, čájeha raporta Eurohpá fievrridansihkarvuođaráđi raporta.
– Mis lea lihkku go orrut riikkas gos lea máilmmi sihkkareamos johtolat. Eat sáhte dan dihte vuoiŋŋastit, go leat ain oallugat geat masset heakkaset dahje roasmmehuvvet garrasit, lohká Årøen.
2017:s dušše 25 250 olbmo johtolagas Eurohpás. Eurohpá fievrridansihkarvuođaráđđi oaivvilda ahte johtolatsihkarvuođabargu Eurohpás lea bisánan maŋemuš jagiid, ja bivdá dan dihte našuvnnalaš eiseválddiid bargagoahtit johtolatsihkarvuođain.
– Jus buohtastahttit iežamet Eurohpáin, de oaidnit ahte mis lea buorre johtolatsihkarvuohta dáppe Norggas. Dat čájeha ahte sii guđet vulget mátkoštit olgoriikii, fertejit leat várrogasat. Olgoriikkas lea olu stuorát várra geavvat johtolatlihkohisvuhtii go dáppe Norggas, lohká Årøen.
