-Almmuhus-
-Almmuhus-
-Almmuhus-
OĐĐASAT14:s duššan johtolatlihkohisvuođain dán jagi

14:s duššan johtolatlihkohisvuođain dán jagi

-

-

Logut čájehit ahte johtolagas leat 14 olbmo duššan dán jági dán rádjái. Čieža olbmo dušše ođđajagemánus ja gávcci olbmo dušše guovvamánus.

Trygg Trafikk logut čájehit ahte 14 olbmo leat massán heakkaset ođđajagemánus ja guovvamánus dán jagi johtolatlihkohisvuođain.

Dát lea lassáneapmi diimmážis, go diibmá ledje oktanuppelogis geat dušše johtolagas jagi vuosttaš guokte mánu.

 

Ain olu ovdal go jokset našunála mihtuid

Gaskamearálaččat leat 19 olbmo jápmán johtolatlihkohisvuođain jagi vuosttaš guokte mánu maŋemuš jagiid.

Vaikko lohku geat leat duššan ja garrasit roasmmehuvvan johtolatlihkohisvuođain lea niedjan, de lea ain olu bargu ovdal go nagodit ollašuhttit našunála mihtuid oažžut sihkkarit johtolaga.

– Leat ain beare oallugat geat roasmmehuvvet ja masset heakkaset lihkohisvuođain, ja dat čájeha ahte mii fertet ain bargat dan nammii ahte ii oktage galgga duššat dahje roasmmehuvvat johtolagas, dadjá Trygg Trafikk direktevra Jan Johansen. 

Lea ain guhká ovdal go njalka dálvesiivu nohká, ja Trygg Trafikk ávžžuha vuddjiid váldit gulul vuojedettiin ja čuovvut bures melde johtolagas.

 

Ávžžuhit olbmuid bures čuovvut mielde johtolagas

– Mii diehtit ahte oallugat geavahit telefuvnna go vudjet biillain, ja dát dagahit olu várálaš dilálašvuođaid johtolagas. Erenoamážit dál go leat njalka geainnut, de ii galgga beare olu ovdal go lihkohisvuohta deaivida. Čuovo mielde mii geavvá geainnu alde, ale ge bargga visot eará, ávžžuha Johansen. 

-Almmuhus-