Politiijat leat váldán gitta 14 olbmo stuora akšuvnnas bargomárkankriminalitehta oktavuođas.
Politiijat leat váldán gitta 14 olbmo stuora akšuvnnas bargomárkankriminalitehta oktavuođas.
Golggotmánu 4.- 5. beivviid leat 200 politiijabálvvá, Politiija olgoriikkalašovttadat, Vearroetáhta, vearrogáibideaddjit, NAV Kontroll ja Bargobearráigeahčču čađahan akšuvnna 411 Davvi-Norgga fitnodagain. Mihttu lei iskkat bargomárkankriminalitehta.
Buorebut gávdnet rihkkosáššiid
– Go bargat ovttas dakkár kriminalitehta áššiiguin, de oaidnit doaresossodagaid ovttasbarggu givrodahkan. Go gávdnat rihkkosiid ovtta ossodagas, de gávdnat dávjá eambbo rihkkosáššiid eará ossodagain. Go ossodagat ovttasbarget, de sáhttit buorebut gávdnat sin geat eai čuovo njuolggadusaid, muitala Skatt nord Kontroll og Skattekrim ossodatjođiheaddji Stein Birger Ringseth.
Mihttu akšuvnnas lei maid gávdnat lobiheames bargiid, sosiála duvdilemiid, olbmuid geain ii leat ássanlohpi Norggas ja oadjoruđa verrošeddjiid.
Čujuhit olggos riikkas
Finnmárkku politiijaguovlu lea váldán gitta guhtta olbmo, Romssa politiijaguovlu golbma olbmo ja Nordlándda politiijaguovlu vihtta olbmo. Politiijat ceggejit áššiid mas ulbmil buohkaide lea čujuhuvvot olggos riikkas. Politiijat árvvoštallet maid lea go vuođđu garraset ráŋggáštumiid čađahit.
– Olgoriikkalaččat geat háliidit bargat Norggas, bálkkáin dahje bálkká haga, dahje jus háliidit doaimmahit bargguid, fertejit oažžut dohkkehuvvot ássanlobi jus olgoriikkalašlágas ii čuoččo eará. Lea dehálaš ahte bargoaddit dihtet dan, muitala Finnmárkku politiijaguovllu bajit politiijabálvá Wenche Henninen.
