Eambbo go juohke goalmmát norgalaš lea leamaš balus johtolagas maŋemuš jahkebeali. Measta bealli mis leat oaidnán dahje vásihan várálaš dilálašvuođaid dahje measta lihkohisvuođaid. – Balddihahtti, lohká Trygg Trafikk direktevra.
Eambbo go juohke goalmmát norgalaš lea leamaš balus johtolagas maŋemuš jahkebeali. Measta bealli mis leat oaidnán dahje vásihan várálaš dilálašvuođaid dahje measta lihkohisvuođaid. – Balddihahtti, lohká Trygg Trafikk direktevra.
Norga lea okta dain riikkain máilmmis gos lea buot oadjebasamus vánddardit luottaid mielde. Muhto liikká ballet norgalaččat luottaid alde. Dan čájehit logut maid Kantar TNS lea Trygg Trafikk ovddas gávnnahan.
– Lea olu mii dáhpáhuvvá johtolagas, ja dávjá oaidnit nákkuid vázziid, sihkkelastiid ja vuddjiid gaskkas. Dat lea maid mielde dagaheame balu. Go mii ballat, de jierásnuvvat ja soaitit lihkastit ovdal go jurdilit, lohká Trygg Trafikk direktevra Jan Johansen preassadieđáhusas.
Eai leat buorit logut
Riikaviidosaš iskkadeapmi čájeha ahte 35 proseantta leat leamaš balus johtolagas maŋemuš jahkebeali, ja 48 proseantta lea vásihan dahje oaidnán measta-lihkohisvuođaid.
Dát logut eai leat Trygg Trafikk mielas buorit.
– Sihkkelastit ja vázzit bohtet lassánit vel eambbo boahtteáiggis, muhto mii fertet sihkkarastit ahte eai geava lihkohisvuođat. Go olmmoš lea balus, ja jierásnuvvá, de ii daga buot viisámus diŋggaid. Mii meaddit ja dat dagaha eambbo lihkohisvuođaid. Muitet nubbi nuppi ja atnet fuola, ávžžuha direktevra.
Galget lassánit
Stuoradiggi lea mearridan ahte gávpogiin galget lassánit vázzi ja sihkkelasti olbmot, eai ge vuoddji olbmot.
Lihkohisvuođastatistihkka čájeha seammás ahte vázzi ja sihkkelasti olbmuin lea stuorat várra jápmit dahje roasmmehuvvat johtolagas, go ovdamearkka dihte biilavuddjiin.
– Go dát olbmot lassánit, de bohtet ođđa hástalusat. Danne lea dehálaš ahte nagodit ođđasit jurddašit ja heivehit vai buot oasit johtolagas heivehit oktii, lohká Johansen.
