Finnmárkulaččaid lohku geat háhke alcceseaset nuvttá oaggunkoartta, lassánii 325 proseanttain 2017:s. Oktiibuot raporterejuvvojedje 56 321 guoli, ja rávdu lei bivnnuheamos.
Oktiibuot 8 601 oaggunkoartta Finnmárkkuopmodagas 2017:s, logu ektui, mii 2016:s lei 6 962.
Sivvan lassáneapmái lea go eanet finnmárkulaččat registrerejit nuvttá koartta. Nuvttá koarttaid addinortnet finnmárkulaččaide álggahuvvui 2016:s lasihan dihte máhtu finnmárkulaččaid guollebivddu birra iežaset fylkkas.
2017:s ledje 1 376 olbmo geat registrerejedje nuvttá koartta ja jagi ovdal fas ledje 424:s. Dat lea 325 proseantta lassáneapmi, čállá Finnmárkkuopmodat (FeFo) preassadieđáhusastis.
Hui duhtavaččat
– Mii leat hui duhtavaččat ovdánemiin, muhto ortnet lea ođas ja lea ain buoridanvárri. Sullii 15 000 finnmárkulaččat bivdet sáivaguliid, lohká meahccehálddašeaddji Kristin Hornset.
Jus hálddašeapmi galgá lea nu buorre og vejolaš, de lea nu buorre máhttu go vejolaš finnmárkulaččaid oaggundábiid birra deaŧalaš FeFoi. Hornset sávvá danne ahte vel eanet finnmárkulaččat ráhkadahttet nuvttá oaggunkoartta 2018:s.
– Ja liigegiktaleapmin áigut joatkit vuoitovuorbádeami ássiid gaskkas geat doibmii bidjet oaggunkoartta ja raporterejit bivddu maiddái 2018:s, lohká Kristin Hornset.
Eanet báikki ássit go statistihkka fáhte
65 proseantta oaggunkoarttain vuvdojuvvojedje olgoriikka guolásteddjiide, eanas oassi Suomas eret.
Leat dušše olgoriikalaččat, ja norgalaččat geat ásset olggobealde Finnmárkku, geat leat geatnegahtton oastit oaggunkoartta.
Go dál vuos leat unnánfinnmárkulaččat geat skáhppot alcceseaset nuvttá oaggunkoartta, de dáidá norgalaččaid oassi geat bivdet guliid Finnmárkkus várra olu stuorát go statistihkka čájeha.
2017:s álggahuvvojit ođđa guollebivdoguovllut (avádagat). Oktiibuot leat dál 62 oaggunguovllu (oaggunavádaga), juoga mii addá dárkilet máhtu guollebivddu ja guollebivdodeattu birra.
Oktiibuot doibmii biddjojuvvo 28 042 guollebivdobeaivvi Finnmárkkuopmodagas 2017:s.
Eanas doibmii biddjon beaivvit ledje Lágesduoddarja guovllus (avádagas) Davvesiiddas ja Hálkavári guovllus (avádagas) Porsáŋggus.
Báhčaveaijohka
Báhčaveaijohka sirrejuvvui 2017:s sierra oaggunguovlun (avádahkan).
Seammás bohte ođđa oaggunnjuolggadusat mat sisttisdolle bákkolaš oaggunkoarttaid buohkaide (nuvttá finnmárkulaččaide), ráfáidahttináiggi ja stuorát unnimusmihttu dápmohii Norgga bealde.
Garraset gáržžideamit ja eanet máhttu guollebivddu birra galgá áimmahuššat stuorradápmotmáddodaga čáhcádagas.
Báhčaveaijohka šattai loahpas viđádin listtus mas ledje oaggunguovllut gos doibmii biddjojedje eanemus oaggunbeaivvit 2017:s.
56 321 guoli
Oktiibuot raporterejuvvojedje 56 321 guoli guollebivdináigodagas 2017:s. Buot raporterejuvvon guliin lei 46 proseantta rávdu, 24 proseantta dápmot ja 11 proseantta hárri.
Hárri lea bivnnuhis nálli galledeaddji guollebivdiid gaskkas geat bivdet astoáiggis, ja dahká guokte goalmmadasoasi sállašiin Nieidagoržži oaggunguovllus, masa gullet Guovdageaineatnu, Mázejohka ja Láhpojohka.
Guovlu lea árvoháhkama álggahanprošeakta sáivaguollebivddu oktavuođas, ja gáibiduvvo sierra oaggunkoartta dohko.
Meahcceháldášeaddji Kristin Hornset sávvá raporterema buorránit vel eambbo. 2017:s buktojuvvojedje raporttat 61 proseantta ovddas dain doibmiibiddjon beivviin.
– Raporteren sáhttá nuppiin sániin šaddat veahá buorebun. Smávvafuođđobivddus lea raporteren sullii 90 proseantta, ja berre leat vejolaš joksat dan maiddái sáivaguollebivddu dáfus, dadjá Hornset.
