-Almmuhus-
-Almmuhus-
OĐĐASAT 13,4 miljon ruvnno lasáhus ja 10 miljovnna 

13,4 miljon ruvnno lasáhus ja 10 miljovnna 

-

-

Eanandoallo- ja biebmodepartemeanta ja Norgga Boazosápmelaččaid Riikkasearvi (NBR) leat šiehtadallan 2020-2021 boazodoallošiehtadusa ja duorastaga bohte ge ovttaoaivilvuhtii lasihit 13,4 miljon ruvnno. Lassin juolluduvvojit vel miljovnnat guohtunroasuid geažil.

NBR ja Eanandoallo- ja biebmodepartemeanta šiehtadallet jahkásaččat ođđa boazodoallošiehtadusa, ja das mearridit earret eará doarjjaortnegiid sturrodagaid ja eavttuid. Rámma šiehtadusas lea 149,5 miljon ruvnno. Dasa lassin lea vel dán dálvvi guohtunroasuide juolluduvvon 10 miljon ruvnno. Šiehtadus lea 13,4 miljon ruvnno lassáneapmi diimmá šiehtadusa ektui. 

Lassin NBR jođiheaddjái Ellinor Marita Jåmai leigga vel Tom Lifjell ja Berit Marie Eira NBR bealis, šiehtadallanlávdegottis. 

Guohtunroasuide ruhta

Šiehtadallamiid bokte lea šiehtadallanbeliin leamaš fuomášupmi guohtunroasuide mat leat dán dálvvi, ja stuora osiin Norgga boazodoalloguovlluin lea heajos guohtun. Šiehtadallanbealit leat ovttaoaivilis ahte lea eahpedábálaš dilli ja leat ge danne nannen heahtegearggusvuođafoandda 10 miljon ruvnnuin. Dát ruđat leat várrejuvvon oastit fuođđariid.

– NBR mielas lea hui dehálaš ahte guohtunroasuide biddjo lassi ruhta dusten dihte guohtunroasu. Šiehtadanbealit čuvvot roasuid ovdáneami dárkilit, ja bealit deaivvadit ge fas ovdalaš beassážiid áigeguovdilastit dili, dadjá NBR jođiheaddji Ellinor Marita Jåma preassadieđáhusas.  

– Mun lean čuvvon guohtundili dárkilit ja lean ilus go mii dál, nu jođánit go vejolaš, sáhttit veahkehit boazodolliid geat leat váttis dilis, dadjá eanandoallo- ja biebmoministtar Olaug Bollestad preassadieđáhusas. 

Lasáhus stádabušeahtas maid

Ruhtadanministtar Jan Tore Sanner lea gearggus evttohit lasáhusa boazodoallogessosii 2021 stádabušeahtas. 

– Mii leat hirbmat duhtavaččat signálaiguin maid leat ožžon boazodoallogessosa ektui. Dat mearkkaša ollu ekonomalaččat juohke boazodoallái. Dat seamma guoská lasáhussii mii guoská buvttadanvuitui, mii lasihuvvo 36 prosentii, dadjá NBR jođiheaddji preassadieđáhusas.  

Jåma háliida maid geassit ovdan orohatdoarjaga mii lea 4,4 miljon ruvnno. Dat ortnet lea dakkár sadjásašortnet luomuid áigge. 

– Lea maid hui ilolaš go fágareiveortnegii lea várrejuvvon eambbo ruhta. Dat mearkkaša ahte šaddet eambbo fágaoahpahallit boazodoalus. Obbalaččat mii gal leat duhtavaččat bohtosiin šiehtadallamiin, dadjá Jåma preassadieđáhusas. 

Duhtavaš ministtar

Eanandoallo- ja biebmoministtar Olaug Bollestad lea maid duhtavaš šiehtadusain ja dadjá šiehtadusa buorren boazodolliide. 

– Mun lean duhtavaš go mii dál leat boahtán ovttaoaivilvuhtii NBR:in ođđa boazodoallošiehtadusa ektui, dadjá Bollestad preassadieđáhusas. 

– Obbalaččat lea dát buorre šiehtadus ja šiehtadus nanne sin geain boazodoallu lea váldoealáhus, ja lasáhus boazodoallogessosii 2021 rájes buorida vel rámmaeavttuid dán dehálaš ealáhussii, joatká eanandoallo- ja biebmoministtar.

Olles šiehtadusa sáhtát lohkat dáppe, ja dáppe gávnnat šiehtadallamiid loahppaprotokolla. 

-Almmuhus-