-Almmuhus-
OĐĐASAT13 oasseváldi NBR čoahkkimis

13 oasseváldi NBR čoahkkimis

-

-

Norgga stuorimus boazodoallosuohkanis ledje dušše 13 oasseváldi boahtán go Norgga Boazosápmelaččaid Riikkasearvi bovdii boazoeaiggádiid boahtit evttohit movt rievdadit ja buoridit NBR organisašuvnna.

Norgga Boazosápmelaččaid Riikkasearvvi bealis lei sihke jođiheaddji Ellinor Marita Jåma ja nubbijođiheaddji Per John Anti boahtán čoahkkimii.

 

Duhtavaš

Jåma lei liikká duhtavaš, vaikke eai lean go 13:s boahtán.

– Muitit galgá ahte lei hui heajos áigi doallat dákkár čoahkkima go olbmot leat boazobargguin, liikká lean duhtavaš go dán mađe bohte, lohká son.

– Ledje gal áinnas galgat eambbogat boahtit.

 

Manin de lehpet bidjan dakkár áigái go olbmot eai astta boahtit?

 

– Mii livččiimet gergosat leamaš áigá juo lágidit, muhto ruhta ii boahtán dalle go galggai. Mii šiehtadeimmet boazodoallošiehtadusa bokte dán bargui, dieđus gáibiduvvui nu ahte mii šattaimet ohcat ruđa Boazodoalu ovdánahttinfoanddas (BOF), ja doppe ádjánii ruhta. Go galgat geargat bargguiguin ovdal boahtte geasi, de fertiimet dál álggahit dan barggu, čilge Jåma.

 

Odne lea čoahkkin Kárášjogas.

-Almmuhus-