-Almmuhus-
OĐĐASAT13 miljovnna lassáneapmi diimmáža ektui

13 miljovnna lassáneapmi diimmáža ektui

-

-

Stáhta ja Norgga Boazosápmelaččaid Riikkasearvi šadde ovttaoaivilii disdat eahkeda. 2019-2020 boazodoallošiehtadusa rámma lea 136,1 miljovnna ruvnno.

Lea 13 miljovnna lassáneapmi diimmá šiehtadusa ektui, nu čuožžu Norgga Boazosápmelaččaid Riikkasearvi (NBR) preassadieđáhusas.

 

– Eat olahan buot mihtuid

NBR dieđiha ahte váldofokus šiehtadallamis lei nannet čálgoortnegiid, lasihit orohatdoarjagiid vai nanne orohagaid barggu areálaáššiin, dearvvašvuođa-, biras-, ja sihkkarvuođaáššiin (DBS) ja doaimmaid nissonolbmuide.

– Vaikko eat olahan buot mihtuid gáibádusain, de leat duhtavaččat go leat ožžon lassáneami árrapenšuvnnas ja ásahan doarjjaortnega nissonolbmuide geain lea siidaoassi, lohká NBR jođiheaddji Ellinor Marita Jåma. 

– Mii leat maid duhtavaččat go orohatdoarjja lea loktejuvvon. Šiehtadallanbealit leat maid ovttaoaivilis álggahit golmma jagi geahččalanortnega mas galgat ásahit DBS-bálvalusa mii heivehuvvo boazodollui. Dat lea dehálaš, earret eará vai eastadit roasmmohuvvamiid ja lihkohisvuođaid ealáhusas, lohká Jåma.

 

Šiehtadallit

NBR ja Eanandoallodepartemeantta šiehtadallet jahkásaččat ođđa boazodoallošiehtadusa, das mearridit earret eará doarjjaortnegiid sturrodagaid ja eavttuid.

Lassin Ellinor Marita Jåmai šiehtadallanlávdegottis leigga Tom Lifjell ja Ánde Niillas Utsi NBR bealis.

Stáhta bealis šiehtadedje Anne Marie Glosli, Marit Myklevoll ja Liv Berit Hætta.

Goappašat šiehtadallanbeliin ledje vel ráđđeaddit ja áššedovdit fárus, čuožžu loahppaprotokollas.

Dáppe logat boazodoallošiehtadusa ja loahppaprotokolla.

 

– Hirbmat buorre šiehtadus

– Dán jagi lea šiehtaduvvon hirbmat buorre boazodoallošiehtadus. Dan vuođul galgat ain nannet ja ovdánahttit boazodoalu ceavzilis ealáhussan márkana dáfus, boahttevaš jagiid. Sii geain lea boazodoallu váldodoaibman vuoruhuvvojit ođđa boazodoallošiehtadusas, lohká eanandoallo- ja biebmoministtar Olaug Bollestad ráđđehusa preassadieđáhusas.

Boazodoallošiehtadusas jotkojuvvojit dat njuolggodoarjjaortnegat mat dagahit einnostahtti ja dássedis ealáhusa, oaivvilda ráđđehus.

Šiehtadusas vuoruhuvvojit maid doarjjaortnegat ásahan dihte liigeealáhusaid. Ovdánahttinprográmma jotkojuvvo, ja oahpahan- ja fuollavuođđuduvvon bálvalusat boazodoalus šaddet bissovaš ortnegin.

Ráđđehus čállá ahte lassi dienas liigeealáhusaid bokte leat dehálaččat go galgá seailluhit ja ovdánahttit bearašvuđot boazodoalu.

Dasa lassin leat lasihan árrapenšuvdna ruhtameriid.

Orohatdoarjja lasihuvvo 10 000 ruvnnuin.

– Go árrapenšuvdna ruhtamearit lasihuvvojit de dat dagaha ahte buolvamolsun boazodoalus dáhpáhuvvá njuovžileappot. Dát lea dehálaš struktuvradoaibma. Dasa lassin lea dehálaš nannet DBS-barggu, dat lea dehálaš suorgi mii geahpeda lihkohisvuođaid ealáhusas, dadjá ministtar.

-Almmuhus-