Birrasiid 1200 bohcco jápmán ja 13 olbmo sáddejuvvon buohccivissui dáđvesonahat-dávddain Jamalnjárggas Davvi-Ruoššas.
Birrasiid 1200 bohcco jápmán ja 13 olbmo sáddejuvvon buohccivissui dáđvesonahat-dávddain Jamalnjárggas Davvi-Ruoššas.
12 bearraša leat maid ferten guođđit guovllu go eiseválddit áigot visot bohccuid dálkkodit. Dan čállá Sverigesradio iežaset neahttasiiddus, ja sii bájuhit Barents Observer ođasásahusa.
Doivo eará siva
Dáđvesonahatdávda (miltbrann) lea goddán daid bohccuid lulli-Jamalnjárggas, birrasiid 500 miilla Suoma rájis eret.
Eiseválddit doivo álggos bohccuid jápmán báhka geažil, go lea juste dan guovllus hui báhkka leamaš, birrasiid 30 lieggaceahki. De čájehuvvui, go ledje Iskosiid váldán bohccuin, ahte lea sáhka Dáđvesonahat-dávdda birra.
Dat sáhttá leat dat vearrámus dáđvesonahat njoammun Ruošša historjjás.
Dálkkodan
Dán rádjai leat ge 1200 duođaštuvvon jápmán, ja 13 olbmo sáddejuvvon buohccivissui dávdda geažil. Dan 13 olbmos leat njeallje máná.
Ruošša eiseválddit leat juo dálkkodan 500 bohcco, ja leat ráhkkaneame dálkkodit vel 2500 bohcco. Áššis ii boađe ovdan movt daid dálkkodit.
Guhka várálaš
Daid jápmán bohccuid áigot Ruošša eiseválddit roggat nu eai galgga olbmuid ja elliid njoammudit, go dáđvesonahat lea hui njoammudávda, ja birge guhká jápmán elliin ovdal go ii leat šat várálaš.
Bázahusat bákteárain sáhttet njoammudit dáđvesonahatdávdda máŋggaid logiid jagiid maŋŋel go ealli mas dat dávda lei lea jápmán.
Dáđvesonahat ii njoamo olbmos nuppi olbmui, njoammu dušše elliin olbmui.
Jus ii oaččo divššu johtilit, de sáhttá jápmit dainna dávddain.
