Cuoŋománus dušše seamma olu olbmot johtolagas go ođđajagimánus, guovvamánus ja njukčamánus.
– Johtolatsihkkarvuođa ektui leamaš cuoŋománnu erenomáš lossat. Oktiibuot jápme dán mánus seamma olu olbmot go dán jagi golmma álgo mánus. Dán lassáneami eat háliit, lohká Stáhta geaidnodoaimmahaga johtolatsihkkarvuođa jođiheaddji Guro Ranes.
2022 njeallje álgo mánus leat 25 olbmo duššan Norgga johtolagas, seamma áigodagas diibmá lei jápminlohku sakka vuollelis. Dalle jápme 14 olbmo.
– Leat iešguđetge sivat jápminlihkohisvuođaide. Mii ávžžuhit olbmuid johtit fuolalaččat ja čuovvut johtolatnjuolggadusaid vai nákcet jorgalahttit dán lassáneami, lohká Ranes preassadieđáhusas.
Ii okta ge jápminlihkohisvuohta
Rogalánddas leamaš eanemus jápminlihkohisvuođat dán jagi. Doppe leat oktiibuot čieža olbmo jápmán dássážii. Seamma áigodagas diibmá eai lean vel doppe vásihan jápminlihkohisvuođaid johtolagas.
Romssas ja Finnmárkkus, Møre og Romsdalas ja Vestlánddas eai oba leamaš ge jápminlihkohisvuođat dán jagi.
Norgga johtolagas leat dássážii dán jagi jápmán 21 dievddu ja njeallje nissona. Ii okta ge mánná leat duššan johtolatlihkohisvuođain, muhto jápminlihkohisvuođain leat ovcci nuorra olbmo gaskal 16-34 jagi jápmán.
