Okta olmmoš Hámmárfeasttas geas dál lea duođaštuvvon korona, lea leamaš Deanus ja doppe leat dál 12 olbmo biddjon erremii.
Hámmárfeastta ássi, gii finadii guossis Deanus, válddii koronaiskosa Deanus, ja su iskosis lei positiiva boađus. Olmmoš lea leamaš restauráŋŋas Hámmárfeasttas, ja njoammunguorranbargu lea čájehan ahte son lea ožžon dávdda doppe.
Maŋŋel go finai restauráŋŋas, de lea leamaš Deanus, gos sus lei oktavuohta 12 olbmuin geat dál leat erremis.
Ii leat sihkar
Deanu sátnejođiheaddji Helga Pedersen muittuha álbmogii ahte koronanjoammun ii leat nohkan, ja ahte várrogasvuohta lea dehálaš.
Son maid muitala ahte ii leat vel čájehuvvon ahte ovttage Deanu ássis lea koronavirus, muhto dat sáhttá leat servodagas.
– Mis leat njoammunguorranbarggut jođus, ja mii váldit iskosiid dán 12 olbmos geat leat leamaš oktavuođas suinna gii finadii dáppe guossis. Nu mii oažžut maid bajilgova lea go dáppe njoammun, ja geasa dávda lea njommon, dadjá Pedersen.
Lagasoktavuođain leat váldon iskosat, ja bohtosat čilget ovtta dahje guovtti jándoris.
Sosiálalaččat dábálaš
Dan olbmos lei nuorvu ja maid feber, muhto lea liikká leamaš sosiála earáiguin, ja vánddardan gilis dábálaččat. Pedersen muittuha dál buohkaid leat várrogassan.
– Dat livččii sáhttán vaikko gii, go eai buohkat oaččo dávdamearkkaid. Danne lea dehálaš bassat gieđaid, doallat gaskka ja eará njoammuneastadandoaimmaid muitit, dadjá Deanu sátnejođiheaddji.
