-Almmuhus-
OĐĐASAT12 olbmo dušše johto­lagas

12 olbmo dušše johto­lagas

Journalista

-

-

Dássážii dán jagi leat suoidnemánus jápmán eanemus olbmot Norgga johtolagas. 

Jápminlihkohisvuođat leat máŋga mánu njiedjan, muhto suoidnemánus lassánedje johtolaga jápminlihkohisvuođat. Oktiibuot jápme 12 olbmo johtolatlihkohisvuođain, ja dat leat golbma eanet go suoidnemánus diibmá, čájehit Trygg Trafikk logut. 

Dássážii dán jagi leat 42 olbmo jápmán Norgga johtolagas, seamma áigge diibmá ledje 55 olbmo duššan johtolatlihkohisvuođain. 

– Mii diehtit ovdalaččas ahte eambbo olbmot jápmet johtolagas geasset, ja dát duođašuvvo maiddái dán jagi go oaidnit man olu olbmot leat duššan suoidnemánus, lohká Trygg Trafikk seniorráđđeaddi Harald Heieraas. 

MC lihkohisvuođat njidjet

Suoidnemánus jápme ovcci dievddu ja golbma nissona johtolatlihkohisvuođain. Njealjis ledje biilavuoddji, golmmas sihkkelasti, guovttis mohtorsihkkelvuoddji, okta mopedavuoddji, okta traktorvuoddji ja okta vázzi. 

– Vaikke jápminlihkohisvuođat lassánedje suoidnemánus, de njidje jápminlihkohisvuođat main mohtorsihkkelvuoddjit dušše. Dássážii dán jagi leat njeallje olbmo duššan mohtorsihkkellihkohisvuođain, diibmá jápme 14 olbmo seamma áigodagas, lohká Heieraas. 

Eanet mánát jápmet

2019 lei erenomáš jahki, go Norgga johtolagas ii jápmán ii okta ge mánná vuollel 15 jagi. Nu ii leamaš diibmá ii ge dán jagi. Dán jagi leat jo golbma vuollel 15-jahkásaš máná duššan johtolagas. 

– Lea váidalahtti ahte eanet mánát jápmet johtolagas. Mánáid sihkkarastin dáidá danin dat buot deháleamos bargu maid dahkat. Lea oainnat erenomáš lossat go mánát ja nuorat jápmet johtolagas, dadjá Heieraas preassadieđáhusas. 

-Almmuhus-