Romssa gávpogis duođaštuvvui eŋgelaš koronavariánta maŋŋebárgga ja seamma eahkeda dieđihii suohkan preassadieđáhusas ahte leat registreren 12 ođđa njoammuma.
Eanaš njoammumiid čatnet koronaleavvamii mii deaividii Romssas ovddit vahkkoloahpa. Gávccis leat lagas oktavuođat eará koronabuhcciide ja guovttis fáhtehalaiga koronavirusii maŋŋel go leaba leamaš Sats Langnes hárjehallanstudios ja Tromsøbadet vuojadanhállas. Guokte maŋimuš njoammuma leat guorran Hársttáide.
– Mii diehtit gos olbmuide lea njommon koronavirus, ja danin joatkit seamma bargovugiiguin go dássážii. Seammás ii leat dilli áibbas stabiila go dát virusvariánta njoammu jođánit. Danin lea hirbmat dehálaš ahte olbmot váldet koronaiskosiid ja ahte eai ovttastala menddo oallugiin, dadjá Romssa njoammuneastadanváldodoavttir Trond Brattland preassadieđáhusas.
Romssa suohkan lea čađahan badjel 3000 koronaiskosa maŋimuš beannot vahkku. Dál leat mearridan iskat 700 olbmo geat gallededje Tromsøbadet vuojadanhálla mannan lávvardaga. Oktiibuot leat 56 olbmo isolašuvnnas.
