Statped almmuha dál ođđa oahpponeavvoresurssaid earenoamášpedagogalaš fágasuorggis. Leat ráhkaduvvon máŋga video kártenávdnasiid birra sihke davvi-, lulli- ja julevsámegillii.
Statped čállá preassadieđáhusasa ahte sii leat buvttadan 12 video main ovdanbuktojit iešguđetlágan kártenávdnasat mat gusket giellaovdáneapmái. Ovcci dain almmuhuvvojit dál. Filmmain čilgejuvvo movt kártenávdnasiid sáhttá geavahit. Dain leat maiddái ovdamearkkat geavaheamis sámegielat mánáiguin ja ohppiiguin sihke Guovdageainnus, Ájluovttas, Romssas ja Rørosas.
– Mii leat hui ilus go leat buvttadan daid resurssaid maidda máŋgasis lea leamaš beroštupmi. Dáinna lágiin mii nannet sámi pedagogaid, mánáid ja ohppiid fálaldaga ja dat leat dehálaš reaiddut giellaoahpahusas, dadjá Statpeda sámi ossodaga ossodatjođiheaddji, SEAD (Sámi erenoamášpedagogalaš doarjalus), Ellen-Marit Oskal Gaup.
Ossodagas leat kantuvrrat Álttás, Guovdageainnus ja Ájluovttas. Statped lea áidna earenoamášpedagogalaš doarjalus mii buvttada oahpponeavvoresurssaid sámegielat mánáide ja ohppiide. SEAD sáhttá addit bálvalusaid suohkaniidda ja fylkkasuohkaniidda heiveheamis oahpahusa sámegielat mánáide, nuoraide ja rávisolbmuide geat dárbbašit earenoamáš heivehemiid, ja geain lea riekti oažžut fálaldaga sámegillii.
