Álttá politiijat dieđihit ahte leat ožžon dieđu fuolastuvvon váhnemiin sotnabeaieahkeda. Sin 12-jahkásaččat ledje vázzimin Bajit Álttá luonddus, lahka Ali-vistti go fuomášedje juoga eatnan alde, dadjá Oarje-Finnmárkku politiijaguovllu operašunjođiheaddji Leif Magne Thomassen iFinnmarkii.
Eatnan alde gávdne mánát poseža man siste lei birrasiid 3 grámma amfetamiidna gárrenmirkko.
Politiijat lohket neahttaáviisii ahte lea unohas go Álttás aitto leat leamaš olu nuorat Altaturneringa oktavuođas, ja de mánát gávdnet dákkáriid.
Politiijat leat duoguštan poseža oktan sisdoaluin.