-Almmuhus-
-Almmuhus-
SIDE1 «115 miilla» ráiddus čuovvut Leif Anders Bongo geainnu Off­road Finn­mark 2021 gilvui

«115 miilla» ráiddus čuovvut Leif Anders Bongo geainnu Off­road Finn­mark 2021 gilvui

-

-

Ávvir almmuha videoráiddu:

Basiid gaskkas almmuhuvvo vuosttaš oassi «115 miilla» videoráiddus. 

Videoráiddu namma lea «115 miilla», ja ráiddus beassat čuovvut Leif Anders Bongo geainnu Offroad Finnmark 2021 gilvui. 

Loga maid:
Off­road Finn­mark 2021: Leif Ante (53) áigu bargat dan maid ii oktage ovdal leat nagodan

Ráidu almmuhuvvo Ávvira neahttasiiddus. Ráiddus leat 6 oasi, ja vuosttaš oassi almmuhuvvo basiid gaskkas. 

– Sus lea garra siskkáldas jođihanfápmu

Sara Risten Susanna Gaup lea bargame filbmaráidduin.

Ráiddus beassat mii čuovvut Leif Anders Bongo, gii áigu searvat buot golmma Offroad Finnmark gilvui, 150 km, 300 km ja 700 km. Ráiddus beassat oaidnit movt son sihke fysalaččat ja mentálalaččat ráhkkana gilvui. 

– Dat lea somá, ja šaddá maid somá čuovvut Leif Ante ovddos guvlui. Son lea hui movttegis ja positiivvalaš olmmoš. Sus lea garra siskkáldas jođihanfápmu, ja dan beassat oaidnit dán ráiddus, dadjá Sara Risten Susanna.

Rievdan oaidnu sihkkelastimii

Sara Risten Susanna lea guhká bargan ráidduin, ja muitala ahte barggadettiin ráidduin lea son ožžon eará oainnu sihkkelastimii. 

– Sávvamis buktá filbmaráidu beroštumi gehččiide, seammás ferten lohkat ahte munnje goit lea buktán ođđa oainnu sihkkelastimii, muitala Sara Risten Susanna ja lasiha: 

– Oaidnit dušše man olu fámuid ja áiggi Leif Ante bidjá dasa adda munnje ođđa ja eará oainnu sihkkelastimii. 

Ii lean eahpádus

Ávvira váldodoaimmaheaddji, Kari Lisbeth Hermansen, muitala ahte Ávvir illuda čuovvut Leif Ante. 

– Go gulaimet Leif Ante plánaid birra, de ii lean eahpádus ge ahte su geainnu Offroad Finnmark 2021 guvlui gal áigut čuovvut, dadjá Hermansen. 

Ávvira váldodoaimmaheaddji, Kari Lisbeth Hermansen illuda čuovvut Leif Ante, ja juogadit Ávvira lohkkiiguin su mátki boahtte geasi Offroad Finnmark gilvvuid guvlui. Govven: Nils Johan Vars
Ávvira váldodoaimmaheaddji, Kari Lisbeth Hermansen illuda čuovvut Leif Ante, ja juogadit Ávvira lohkkiiguin su mátki boahtte geasi Offroad Finnmark gilvvuid guvlui. Govven: Nils Johan Vars

Leif Ante áigu geahččalit čađahit buot golbma gilvvu, 150 km, 300 km ja 700 km. 

– Dan maid son áigu geahččalit leat earát ovdal geahččalan, muhto ii oktage nagodan. Dan dihte orui min mielas gelddolaš go dál sámi sihkkelasttii áigu dan geahččalit, muitala Hermansen ja lasiha: 

– Sus lea niehku, mihtut ja bargá dihtomielalaččat olahit boahtte geasi stuora mihttu.

Illudit

Hermansen muitala ahte Ávvir illuda čuovvut Leif Ante, ja juogadit Ávvira lohkkiiguin su mátki boahtte geasi Offroad Finnmark gilvvuid guvlui.

– Vaikko lea maŋemus jagiid beaggán sámi sihkkelastiid gaskkas, de ii leat son beaggán proffasihkkelastiid searvvis. Juste dan dihte lea ge min mielas somá su čuovvut. Son áigu čájehit ahte olmmoš sáhttá olahit vaikko maid go garrasit bargá, dadjá Hermansen. 

-Almmuhus-