-Almmuhus-
-Almmuhus-
OĐĐASAT 110:s dušše johtolagas diibmá

110:s dušše johtolagas diibmá

-

-

110:s dušše johtulagas 2019:s, mii lea guokte eambbo go ovddit jagi.

Juovlamánus masse 14:s heakka johtolagas, mii lea badjel beali eambbo go seamma áigge ovddit jagi.

Golmma maŋimuš jagis leat gaskal 106 ja 110 olbmo jahkásaččat duššan johtolagas, dát lohku lea leamaš seamma dásis, dieđiha, Trygg Trafikk sin preassadieđáhusas.

– Ovdal juovlamánu lei mis doaivva ahte 2019 galggai šaddat dat jahki goas eai duššan nu olu olbmot johtolagas. Dađi bahábut šattai juovlamánnu váivves mánnun johtolagas ja mii leat ain guhkkin eret dan nullavišuvnnas go ii oktage dušša dahje roasmmehuva garrasit johtolagas. Lea ain guhká dassái go mii leat gos galggašeimmet leat, dadjá Jan Johansen Trygg Trafikk preassadieđáhusas.

Mánát eai duššan 

2019 lea liikká ilolaš jahki ovtta láhkai. Lea vuosttaš geardde go ii oktage vuollel 16-jahkásaš mánná dušsan johtolagas dan rájes go Trygg Trafikk álggahii barggu 1956:s.

– Ii oktage mánná jápmán johtolagas vássán jagi, mii lea issoras buorre, dadjá  Johansen.

71 proseantta almmáiolbmot

Juohke goalmmát jápminlihkohisvuođas 2019:s ledje lossa vuojánat mielde lihkohisvuođas.

Dat mearkkaša ahte lossa vuojánat ledje mielde 36 jápminlihkohisvuođas diibmá. 2019:s ledje 79 almmáiolbmo ja 31 nissona geat dušše johtolagas.

Dat mearkkaša ahte leat 71 proseantta almmáiolbmo geat dušše, mii lea leamaš gaskamearálaš lohku logi maŋimuš jagis.

- Advertisement -
-Almmuhus-