Oaidnit leš, ferte go Energi Norge maid streiket, lohket EL ja IT Forbundet lihtut.
Dán vahku deaivvadit EL ja IT lihttu ja Energi Norge soabadeamis, maŋŋá go energiijasoahpamuš boatkanii miessemánus. Dat soahpamuš guoská energiija- entreprenevrrasuorggi, energiijaváráiduhttima ja buvttadeami bargiide. Okta daid guovddáš riidogaskaomiide gullá mátkeáigenjuolggadusaide. Dál fertejit bargit astoáiggis vuolgit ruovttus go bargi barggu oktavuođas ii sáhte idjadit ruovttus guhkit áiggi.
– Dálá dilli ii leat dohkálaš go dakkár barggut leat dávjjit ja bargomátki lea guhkkon. Min vuolggasadji lea ahte ruovttumátki lea bargomátki go mátkkošta bargoaddi ovddas, lohká EL ja IT lihtu ráđđádallanjođiheaddji Bjørn Fornes preassadieđáhusas.
1100 bargi 14 finodagas oktan sin vuolit surggiin sáhttet biddjot streikii jus bealit eai soabat lávvardatidjii.
Sii leat: Dragefossen AS, Eviny Solutions AS, Frost Kraftentreprenør AS, Infratrek Norge AS / Omexom, ISE AS, Kraftmontasje AS, Laje AS, Nettpartner AS, On Energi AS, Otera Infra AS, Stange Energi Aus AS, Valdres Energi Entreprenør AS, Varanger Kraftentreprenør AS ja Viken Energimontasje AS.
Bargoaddi bealli lea geahččalan botnjat ášši ahte lea sáhka Norgga ja Eurohpá elrávdnjedilis, muhto dasa eai mieđa EL ja IT lihttu.
– Min mihttomearri lea garvit riiddu áššis man lea álki čoavdit jus nuppe bealli čuovvolivčče min sávaldaga, lohká Fornes.
