-Almmuhus-
OĐĐASAT11 olbmo heavvanedje miessemánus

11 olbmo heavvanedje miessemánus

-

-

Gávcci almmáiolbmo, guokte nissona ja okta mánná heavvanedje miessemánus.

– Dat fiinna dálki stuorra osiin riikkas lea dagahan ahte eanet olbmot leat váldán meara ja sáttogáttiid atnui, dadjá Redningsselskapet generalačálli Rikke Lind.

 

Vuojadettiin heavvanedje

Guovttis geat heavvanedje leigga vuojadeamen. 75-jahkásaš nissonolmmoš heavvanii Strand gielddas Rogalánddas, ja 28-jahkásaš almmáiolmmoš heavvanii Bergenis. Viđas heavvananlihkohisvuođain ledje fatnasiin jođus. Golmmas heavvanedje astoáigefatnasiin, okta fidnofatnasiin ja okta kanoin/kajakkain.

– Go gii nu heavvana, de čuohcá dat bearrašii, ustibiidda, bargoustibiidda ja olles lagašservodahkii. Redningsselskapet bargá dan várás ahte ii oktage galgga heavvanit, ahte mis lea gádjunfatnasat gearggusvuođas miehtá rittu ja doaimmahit miellaguoddobarggu, dadjá Lind, geas lea rávvagat buohkaide geat leat mearas ja jávrriin.

 

Rávvagat
– Váldde vára alddát ja sis geat leat du mielde. Geavat govdunliiva, heivet leavttu dálkki mielde ja leage čielggus go vuoját fatnasiin.

 

Lind dáhttu maiddái olbmuid leat várrogassan go gálašit.

 

– Gálaš ovttas earáiguin, ja dárkkis dilálašvuođa ovdal go gálašat/vuojadat. Jus leat mielde mánát, de lea dehálaš atnit sin čalmmis. Mánát geat stohket čázis berrejit geavahit muhtinlágan govdunliivva, ávžžuha Lind Redningsselskapas.

 

Almmáiolbmot eanetlogus

Dássážii dán jagi leat 37 olbmo duššan heavvaneami geažil, diibmá ledje 29:s geat dušše. Almmáiolbmot leat eanetlogus dán statistihkas, go ledje 32 almmáiolbmo geat heavvanedje. 24:s sis ledje badjel 40-jahkásaččat, ja golmmas ledje vuollel 25-jahkásaččat.

Hordalánddas ja Rogalánddas lea vihtta olbmo heavvanan dássážii, golmmas lea heavvanan Nordlánddas ja Trøndelágas. Møre ja Romsdálas heavvanedje golmmas miessemánus.

 

-Almmuhus-