Romssa gielda ávžžuha válddihit iskosa jus leat leamaš Heidi’s Bier Baras.
Maŋŋebárgga duođaštuvvojedje olles 11 ođđa koronanjoammuma Romssas. Dat ođđa njoammumat bohtet dálá leavvamis. Romssa gielda ávžžuha buohkaid geain leat dávdamearkkat válddihit koronaiskosa.
Leat go leamaš Heidi’s olgobáikkis mannan vahkoloahpa?
Romssa gielda čállá preassadieđáhusas ahte olu dain ođđa njoammumiin lea čanus olgobáikái, Heidi’s Bier Bar. Eanaš njoammumat leat lagasoktavuođat daidda geat ledje jo oahppásat gildii. Muhtin njoammumiid eai leat nagodan guorrat eará njoammumiidda.
– Mii ávžžuhat dál buohkaid, geat leamaš Heidi’s Bier Baras mannan bearjadaga ja lávvardaga, válddihit iskosa, ležžet go dávdamearkkat vai eai, dadjá gielddadoavttir, Inger Hilde Trandem, preassadieđáhusas.
– Mii maiddái ávžžuhat buohkaid geat dovdet dávdamearkkaid válddihit iskosa. Gávpogis lea njoammun ja dat orru leavvamin jođánit, dadjá Trandem preassadieđáhusas.
Gearggusvuođajoavku bargá
Gielda áigu váldit oktavuođa buot olbmuiguin geaidda lea njommon ja sin lagasoktavuođaiguin. Oassi gieldda gearggusvuođajoavkkus barget veahkkin njoammunguorramis.
– Guorranbargu lea áddjás detektiivabargu. Guorranjoavku riŋge lagasoktavuođaide geaid birra dihtet. Jus diehtá ahte sus leamaš oktavuohta ovttainge geas lea njoammun, galggašii bissut ruovttus ja vuordit dassá go váldo oktavuohta, ja iskkaduvvot jus leat dávdamearkkat, dadjá koronaguovddáža jođiheaddji, Per Harald Korsmo preassadieđáhusas.
Iskanguovddáš Sydspissenis dollo rabas gaskavahkkus bearjadahkii diibmu 09.00 gitta 21.00.
