Golggotmánus dušše čiežas johtolagas. Dat mearkkaša ahte dássážii dan jagis leat čuođis duššan Norgga johtolagas.
– Go ná olusat leat duššan johtolagas oanehis áiggis, de čájehuvvo ahte lea dárbu doaibmabijuide. Mis lea mihttu ahte ii oktage galgga duššat dahje garrasit roasmmohuvvat Norgga johtolagain, muhto ovdal go dan ollašuhttit de leat olu unna mihtožat vuos, muitala Trygg Trafikk gulahallanjođiheaddji Cecilie Bryner preassadieđáhusas.
Son oaivvilda ahte dál lea áigi unnidit leahtu go vuodjá.
– Lea váttis fuomášit olbmuid mat vázzet luoddaguora go lea seavdnjat, muhto lea maid váttis sin fuomášit geat áigot rasttildit luottaid. Biilavuddjiin lea vejolaš unnidit lihkohisvuođaid johtolagas. Sii sáhttet vuoddját buori áiggis, leat áicilat ja čuovvut mielde mii luoddaguoras lihkasta.
