Suopmelaš Petri Hautamäki vuittii Ohcejoga luossariemuid 10.949 kilosaš luosain.
Suopmelaš Petri Hautamäki vuittii Ohcejoga luossariemuid 10.949 kilosaš luosain.
Dán jagáš vuoiti Perti Hautamäki lei ilus go vuittii 10.949 kilosaš luosain. Dán jagáš vuoiti beasai válljet háliidii go johkafatnasa vai fanasmohtora vuoitun. Petri vállji johkafatnasa. Luossariemut ledje ikte Ohcejogas. 138 oassálastti ledje mielde gilvvuin.
– Mus lea álo leamaš miella eaiggáduššat johkafatnasa ja mun dieđusge válljejin dan vuoitun, dadjá Petri Hautamäki, gii lea eret Pietarsaaris Vaasa gávpoga lahkosis.
Darvehii luosa
– Mun darvehin luosa vuggii ja dat ii mannan nu guhkes áigi ovdal go ožžon dan fatnasii. Álggos dat ii fuollan mus dan vuokka, muhto de fáhkka dohppestii ja dalle gal dárvehin luosa ja dat lei hui somá, dadjá vuoiti.
– Elias buvttii lihkku
Vuoitis lei mielde gilvvus ohcejohkalaš Oskari Helander ja su bárdni Elias.
– Mun oaččun álo stuorra luosa go mu bárdni Elias lea mielde, son lea mu lihkku, dadjá lihkolaš vuoiti.
Son muitala son lea juohke jagi Ohcejogas bivdimin ja mielde gilvvus.
Heajos dálki
Lágideaddji Aulis Nordberg lohká beaivvi mielde leat olbmot fitnan Luossariemuin, muhto son jáhkká arvedálkki baldán veaháš olbmuid galledeamin riemuid.
– Dán jagi ledje mielde 138 luossabivdi gilvvus ja oktiibuot 13 luosa fitnejedje gilvvus. Vuoitoluossa dettii 10.949 kilo ja dat unnimus diddi dettii 1.426 kilo. Dán jagi eai eai searvan nu oallugat go diibmá, mun jáhkán dat lea dat dálki mii lea váikkuhan dasa, dadjá lágideaddji Aulis Nordberg.
Stuorámus luossa mii lea goddon Luossariemun dettii 22.400 kilo, ja dan gottii Jan Nystad 1991s.
Váikkuhit boahtte jagi gilvvuide
Lágideaddji Aulis Nordberg lea maiddái Ohcejoga politihkkár ja čohkká Ohcejoga gielddastivrras ságadoallin, ja son jáhkká dat ođđa evttohuvvon njuolggadusat Deanučázádahki bohtet váikkuhit Luossariemu gilvvuide.
– Dat varra boahtá váikkuhit luossagilvvuide maiddái. Vaikke leat sierralobit go luossagilvu lágiduvvo, de jáhkán dat ođđa njuolggadusat bohtet váikkuhit gilvui jus boahtte jagi maid lágiduvvo. Mii dárbbašit eará lobi dán beaivái. Dán beaivvi eai dárbbaš turisttat báikkálaš suhkkiid go sii ieža besset suhkat, go mis lea dakkár lohpi dán beaivvi. Jus šaddá nu go evttohuvvon, de dárbbašit mii eará lobiid gilvobeaivái, lohká Norberg.
Garra gáržžideamet
– Mun in vuostil bivddu gáržžideami Deanus, vai mis ain lea luossanálli čázádagas. Muhto mu mielas gáržžidit nu ollu daid báikkálaš rivttiid ja maiddái nu ollu fáhkkestaga. Mu mielas livččii buoret jus áiggi mielde veaháš gáržžida, dadjá Aulis Nordberg.
