Norgga našunálabeaivvi leat politiijat vearuduvvon.
Politiijadirektoráhta lea mearridan vearjudahttit politiijaid miessemánu 17. beaivvi.
– Mii láhččit dili nu ahte lea oadjebas ja hávski ávvudit našunálabeaivvi. Min árvvoštallama vuođđun lea maiddái vearjudahttit politiijaid vai nagodit fállat buoremus ja jođáneamos bálvalusa, jus mihkkege galggašii dáhpáhuvvat, dadjá politiijadirektevra Benedicte Bjørnland preassadieđáhusas.
Áitagat eai leat gulustuvvan
Vaikke vearjudahttet politiijaid miessemánu 17. beaivvi, de eai daja makkár ge konkrehta áitagiid vuođđun dása.
Vearjuduvvon politiijat galget áimmahuššat sihkkarvuođa, nu go jo dahket eará stuora doaluin.
– Maŋimuš jagiid dáhpáhusat Eurohpás muittuhit ahte lea dehálaš ásahit doaibmabijuid, go unohis dáhpáhusat sáhttet deaividit. Mii fertet váldit sihkkarvuođa duođalaččat, vaikke eai leat konkrehta áitagat ja mis galgá buorre gearggusvuohta dán beaivvi, dadjá Bjørnland.
Ovttasbarget
Politiijat ovttasbarget dábálaččat sihke gielddaiguin ja miessemánu 17. beaivvi lágideddjiiguin sihkkarvuođa ektui.
Olbmot vuhttet muhtin ráje doaibmabijuid, muhto stuora oassi eastadanbarggus lea jo čađahuvvon ovdal lágidemiid.
– Mii geat bargat politiijas, dahkat dan maid sáhttit vai miessemánu 17. beaivi šaddá hávski ja mii ávžžuhit buohkaid ávvudit našunálabeaivvi nu go lávejit, dadjá Bjørnland.
