-Almmuhus-
OĐĐASAT​– Ii šatta Nussir-ruvke

​– Ii šatta Nussir-ruvke

-

-

Nussir-ruvke Riehpovuonas duvdá eret boazodoalu ja guolásteami guovllus, ja rihkku eanan- ja resursavuoigatvuođaid. Eiseválddit eai sáhte danne addit doaibmalobi ruvkii, cealká sámediggeráđđi Inger Eline Eriksen Fjellgren.

Gaskavahkku borgemánu 2. beaivvi lei sámediggeráđis Inger Eline E. Fjellgrenas (Árja) čoahkkin Fiettar-orohaga ovddasteddjiiguin. Doppe sii ságastalle man láhkai ovddos guvlui ovttasbargat caggan dihtii Riehpovuona ruvkeplánaid. 

 

Vuostálastet ruvkedoaimmaid

– Mii leat ovttaoaivilis ja doarrut searválaga ruvkedoaimmaid vuostá. Sámedikkis leat olu ákkat manne ii sáhte álggahit ruvkke Riehpovutnii, ja okta dain lea ahte dat duvdá eret boazodoalu guovllus, muitala Inger Eline Eriksen Fjellgren.

 

Dál lea ášši Mineráladirektoráhtas, ja ohcamuš doaibmalohpái lea almmolaš gulaskuddamis. Jus Sámediggi dahje FeFo hilgu doaibmalobi, de ferte Ealáhus- ja guolástusdepartemeanta meannudit ášši. Jus sii juolludit doaibmalobi, sáhttá Sámediggi dan mearrádusa guoddalit ráđđehussii.

 

Minerálalága vuođul galgá sámi kultuvrra, boazodoalu, ealáhusdoaimmaid ja servvodateallima mearkkašahtti olu deattuhit doaibmaohcamušas.

 

– Fertejit loahpahit ruvkeplánaid
 Mii áigut dieđusge albmaláhkái čuovvulit dán ášši minerálalága ja Finnmárkolága vuođul. Jus stáhta eiseválddit eai árvvoštala ášši nu mo galget lága mielde, de fertet ášši guoddalit riikkaidgaskasaš olmmošvuoigatvuođaorgánaide ja Norgga duopmostuoluide. Jus nu lea dárbu, de ovttasbargat mii orohagain dan barggus, dadjá Fjellgren. 

 

– Dál lea bággu eiseválddiid váldit duođas ahte Finnmárkku álbmot lea vuostá ruvkedoaimmaid ja dan mii Norgga lágas čuožžu. Sii fertejit dál loahpahit daid ruvkeplánaid. Fiettar-orohagas leat dál geavahan ovcci jagi dán áššái, ja áddemis sii baicce áiggošit geavahit áiggi ja bargonávccaid siiddastallat ovdal go soahtat stáhta vuostá, loahpaha sámediggeráđđi Inger Eline Eriksen Fjellgren.

-Almmuhus-