-Almmuhus-
OĐĐASAT – Unohas go billistit galget

 – Unohas go billistit galget

-

-

Suohkana kulturbálgá darfegoahti lea buollán gutnan. Gohttenbáikki eaiggát lohká dán vahágin turistaealáhussii.  

Guovdageainnu suohkana olgobearráigeahčči Anders Adam Triumf dat lei gaskavahku doalvume muoraid ja ođđa nammagirjji poastakássii mii lea Fárppaljávrri bálggesgeažis Guovdageainnus. Dát lea suohkana kulturbálggis. 2,3 km Suohpatjávrre gohttenbáikkis nuorttas, mii lea ráhkaduvvon vázzinbálggisin badjel 20 jagi áigi juo.

 

 – Heajos dahku

 – Go fuomášin darfegoahti lei buollán gutnan, jurdilin ahte soames ii leat jáddadan dola albmaládje, jus dette duorggat leat buollán. Ii leat vuođđu gal dadjat dat lea cahkkehuvvon, muhto jus nu lea, de lea dieđusge heajos dahku, dadjá Triumf.

Dát meahccebálggis mii vuolgá Suohpatjávrris lulábealde márkana, lea hui bivnnut, go olu mánáidgárddit ja skuvlaluohkát lávejit váccašit bálggesráigge Fárppaljávrái. Dan gaskkas leat olu poasttat vel maid sáhttá lohkat ja dain oahppat feara maid. Triumf muitala buoremus jagiid leamaš 750 olbmo geasis čállime nama.

 

Buohkat sáddejit turisttaid


– VAHÁT GO LEAT BILLISTUVVON: Gohttenbáikki eaiggát Ellinor Beck lohká darfegoađi dehálažžan turistafitnodagaide. Vuorkágovva. 

Kautokeino Fritidssenter gohttenbáikki eaiggát Ellinor Beck atná hui vahágin go goahti lea buollán, go dat lei juoga mii čájeha sámivuođa turisttaide. Son lei lagamus ránnjá dán kulturbálgás, ja atná hui vahágin go guovlu lea billistuvvon.

 – Lea hui unohas go dat lea buollán, go darfegoahti lei dakkár sámi diŋga mii gullá deike. Ii dáppe leat nu olu mii muđui čájeha sámivuođa turisttaide. Buot idjadanbáikkit lávejit maid ávžžuhit olbmuid vázzit doppe, sihke hotealla, Juhls ja earát. Mu guossit maid lávejit doppe viššalit váccašit, muitala Beck.

 

Eambbo billisteamit

Ii ge leat dušše dat mii lea billistuvvon. Beck muitala ahte maiddái čohkkánbeaŋkkat mat leat biddjon bálgá gurrii, leat leamaš cuvkejuvvon nu ahte ii sáhte šat báljo čohkkedit daid nala.

 – Dát livččii goit hui fiinna ja jaskes báiki gos vázzá mohkiid. Juohke beaivvi vázzet olbmot doppe, sihke gili olbmot, Álttá guovllu olbmot ja maid suomabeale mánáidgárddit. Busset bisánit dávjá ja vázzet doppe mohkiid. Lea hui dehálaš báiki, ja hui vahát go lea billistuvvon, dadjá son.

 

Árvvoštallama duohken

Suohkan ii leat dieđihan ášši politiijaide. Triumf lohká sin áigut árvvoštallat leago dan veara cegget ođđa darfegoađi dán báikái.

 – Okta čoavddus lea snihkket baicca grillagoađi, mii livččii hálbbit ja álkit go árbevirolaš darfegoahti. Darfegoahti gal šaddá goit máksit birrasiid 50.000 ruvnno, árvvoštallá Triumf.

 

-Almmuhus-