Eveline Koch vuittii FL-500 RNB-luohká ja šattai máilmmemeašttirin das. Muhto su sibirjjá huskyide lei oažžut buollašeabbo go dál lea leamaš.
Mánnodat eahket bođii Eveline Koch mollii Áltái, ja vuittii FL-500 RNB- luohká, ja nu šattai maid máilmmimeašttir guhkesgaskka beanavuodjimis. Son lea nederlándalaš gii orru ja vuodjá beatnagiiguin Ruoŧas.
– Lea hui buorre dovdu dál. Beatnagat leat dahkan buori barggu, ja lean hui rámis daiguin, dajai lágideddjiide go ollii.
Doaladan ovddemus
Finnmarksløpet neahttasiiddus čállet ahte Eveline Koch lea leamaš njunnošis dán suorggis measta čađat dan rájes go vulggii Álttás, ja measta buot bisánanbáikkiide lea ollen ovddemus, earret Jergolii. Son lea ovdal lohkan ahte ii leat čuvvon vuodjinplána nu juste, muhto lea baicca vuoiŋŋastan go lei dárbu. Son bođii 15. ráidun molli dan 76 beanaráiddus mat vulge FL 500 km- lahtu vuodjit.
Koch lea dadjan ovdal lágideddjiide ahte lahtut eai lean nu go son lei vuordán.
– Ledje eambbo vustolagat ja luohkát go mun ledjen jurddašan, dajai son lágideddjiid preassaolbmuide go olli Skuvvanvárrái.
Ledje oažžut galbmagrádat
Bivvalis dálki, birrasiid nulla gráda, ii leat leamaš nu buorre su sibirjjá husky-beatnagiidda.
– Daidda gal livččii ollu buoret logi galbmagráda, muhto lea bieggan čađat, mii čoaskudii beatnagiid ja nu birgeje bures, muitalii son go ollii mollii.