-Almmuhus-
OĐĐASAT – Ii gánnát šat oastit firpmiid

 – Ii gánnát šat oastit firpmiid

-

-

Deanu fierbmebivdi Jovnna Harald Johansen ii loga dál šat dárbbašit oastit firpmiid jus dat ođđa šiehtadus ilbmá duohtavuohtan. Geahča filmmaža loahpas!

Dálkkádat- ja birasdepartemeanta lea mannan duorastaga sádden šiehtadusa gulaskuddamii ráđđehussii ja seamma lea Eanan- ja meahccedoalloministeriija Suoma bealde, man Norga ja Suopma leat soahpan Deanočázádaga birra.

 

Gulaskuddama sisdoallu

Dálkkádat- ja birasdepartemeanta cealká ahte váldoulbmil šiehtadusain lea guovttedáfot.

Vuosttaš lea ahte galgá láhččojuvvot dilli dohkálaš luossabivdui, vai luossanálli beassá laskat.

Dalle leat bivddu unnidan, ja evttohusas biddjo unnidanmunni gitta 30 prosenttii.

Nubbi lea ahte galget ráddjet turistabivddu, vai dat ii hehtte árbevirolaš ja báikkálaš bivddu.

 

Dušše guokte beaivvi

Fierbmebivdi Jovnna Harald Johansen lea bivdán firpmiiguin Deanus 50 jagi, sihke golgadan ja buođuin, dál son ii oainne ávkki šat oastit ođđa firpmiid.

Son lohka stuorra oasi golgadanáiggis gáržžidit go váldet eret guokte vahku miessemánus ja dalle báhcá dušše guokte vahku vel goas sáhttá golgadit, ja dušše guokte beaivvi dan guovtti vahkus.

 

Ii gánnáhahtti oastit firpmiid

Johansen muitala ahte ođđa šiehtadusas leat nu ollu gáržžideamen fierbmebivddu hárrái ahte ii gánnát šat oastit firpmiid.

– Ii leat gánnáhahti oastit ja doalahit firpmiid, go mákset sullii 100 000 ruvnnu oktiibuot fierpmit, fanas ja vel mohtor, dadjá Jovnna Harald Johansen.

Dál ii leat rádji man olu bivdokoarttat galget vuvdot turisttaide.

Evttohuvvon lea ahte galget 22 000 jándorkoartta vuvdot turisttaide, ja goabbá ge riika oažžu 11 000 turistakoartta vuovdit.

Ášši joatká gová vuolde.


Deanu fierbmebivdi Jovnna Harald Johansen.
Govven: Silje Malene Varsi

Gáržžidit boastut ja boasttu áiggis

Son oaivvilda ahte ráđđehus gáržžida boastut golgadeamis.

Johansen dadjá ahte go eiseváldit áigot gáržžidit golgadeami, de leat sii su oaivila mielde dahkan dan boastut, ja berrejit baicce diktit golgadit guokte vahku árabut go ain lea dulvečáhci Deanus.

 

Dulvečáhci

– Ferte leat dulvečáhci go áigu golgadit, dalle lea ain Deatnu duolvvas ja moivvas, dalle čákŋá luossa fierbmái, lohká Johansen.

Šiehtadus lea maid su mielas boasttu áiggis sáddejuvvon gulaskuddamii go buohkat leat geasseluomus, ja eai leat buohkat geat astet addit cealkámušaid go leat luomus.

 

Sámi árbevierru

Johansen muitala son lea iežas áhčis oahppan golgadit ja buođđut, ja dál son ballá dán árbevieru jávkamis.

– Nuorat eai gille buođđut ja golgadit, leat dušše ain moadde vuorrasut olbmo geat golgadit ja buđđot. Mii leat vissa dat maŋimuš kulturguoddit, dadjá Jovnna Harald Johansen vel loahpas.

-Almmuhus-