-Almmuhus-
-Almmuhus-
-Almmuhus-
OĐĐASAT –Ii 45 minuhtas olle

 –Ii 45 minuhtas olle

-

-

Finnmárku berre ovttastahttot oktan politiijaguovlun, ja Guovdageidnui berrejit virgádit eambbo politiijaid. Dat lea oassi Sámedikki ávžžuhusas politiijareforbmii.

Odne distaga leigga Sámedikki politihkalaš ráđđeaddi Runar Myrnes Balto ja ossodatdirektevra Hege Fjellheim Sarre justislávdegotti almmolaš gulaskuddančoahkkimis politiijalága ođasteami birra.

Sámegielat politiijabálvvát ja guhkes gaskkat lei sudno váldofáddá.

 – Dál ii leat lunddolaš ahte Kárášjohka ja Guovdageaidnu gullet goabbat politiijaguvlui. Jus Oarje- ja Nuorta-Finnmárkku bijašii oktii, buorránivččii sámi álbmogii Finnmárkkus fálaldat go de nannejuvvošii politiijaid sámegielagelbbolašvuohta.

 

Guovdageidnui eambbosiid

Myrnes Balto válddii erenoamážit ovdan go Guovdageainnu leansmánnikantuvrras leat guokte virggi sirdon Áltái.

 – Dál lea dilli nu ahte Guovdageainnus lea leansmánni ja guokte politiijabálvvá. Ovdal ledje vel guokte bálvvá, muhto daid leat “luoikan” Áltái, ja barget doppe dušše dárbbu mielde. Norggas lea politiijaid joavdanáigi biddjon 15 minuhttii. Guovdageainnus lea dat áigi biddjon 45 minuhta, muhto ii nu oanehis áiggis áhte vuodjit dan gaskka dorvvolaččat. Jus doppe galget sierra vuorut, ferte danne virgádit Guovdageidnui eambbo bálvváid, dadjá son.

 

Sámediggi muittuhii ahte Sámi giellaláhka guoská maid politiijaide ja riektevuogádahkii.

 – Dál lea Guovdageainnus dušše leansmánni gii hálddaša sámegiela, ja dat buktá stuora hástalusaid. Sámegielagelbbolašvuohta lea dehálaš jus sámi álbmogii galgá leat seamma fálaldat go dárogielagiidda, dadjá Myrnes.

 

Muitit suohkanreforpma

Sámi giellalága hálddašanguovllus leat dál 11 suohkana, 4 fylkkas. Láhka fátmmasta njealji sámegiela, julevsámegiela ja lullisámegiela.

 – Dál eat ge dieđe vel movt suohkanreforbma váikkuha sámi suohkaniidda, ja movt das áimmahuššet sámegielagiid vuoigatvuođaid. Danne ii sáhte politiijareforpma ge geahččat áibbas sierra, muittuha Runar Myrnes Balto justislávdegoddái.

 

Boazopolitiijaid Guovdageidnui

Sámediggi maid čujuha boazopolitiijaide, mii dál jođihuvvo Hámmárfeasttas.

 – Dat berre sirdot Guovdageidnui. Dál eai leat boazopolitiijas sámegielat bálvvát, ja dat lea váttis go galgá bargat ealáhusas mas beaivválaš giella lea sámegiella ja báikenamat leat sámegillii.

 

Sámediggi oaivvilda muđui ahte boazologuproseassaid dihte berrešii maid nannet ovttasbarggu ealáhusain giela bokte. Sii namuhit maid politiijaid dihtorvuogádaga, mii dál ii leat heivehuvvon sámegiel báikenamaid čállimii, ja lohket 112 heahteguovddáža sámegielmáhtu berret buoriduvvot. Maiddái sámi riekteveahkkekantuvrra heaittiheami Kárášjogas sii moite dán oktavuođas.

 

-Almmuhus-