-Almmuhus-
OĐĐASAT – Skuvlla váttisvuođaid berre čorget

 – Skuvlla váttisvuođaid berre čorget

Journalista

-

-

Kárášjoga Dáloniid listta njunnoša Åshild Joks Andresena mielas galggašii jođánit gávnnahit mii lea váttisvuohta skuvllas ja čorget dili.

Kárášjoga dáloniid listta vuosttaševttohas gielddaválggaide lea vástidan Ávvira gažaldagaide, mas jerro makkár áššiid atná deháleamosin gielddaválggaid oktavuođas.

Ávvir lea jearran golbma gažaldaga buot listo- ja bellodatnjunnošiin, ja dá leat Kárášjoga dáloniid listta njunnoša Åshild Joks Andresena vástádusat.

 

1. Makkár ášši anát don deháleamos válgaáššin din suohkanis?

2. Mii du oaidnu lea dan áššis?

 

Vuosttaš gažaldahkii vástida ná:

– Ferte čorget skuvlla váttisvuođaid. Ferte kártet mii lea váttisvuohta ja gávdnat dasa čovdosa. Čáhce- ja kloahkkarusttegat fertejit buoriduvvot ovttatmanos ja dasa ferte gávdnot jođáneamos lági mielde ruhta. Álbmot máksá divrasii dán fálaldaga, mii ii leat doarvái buorre. Ovttasbargu bellodagaid ja listtaid gaskka lea maid buktán ollu moivvi gielddastivrii, čállá son

 

Ovddida kloáhkka- ja čáhceváttisvuođaid

Su mielas ii berrešii nuppiid sivahallat go ii olat politihkainis, muhto baicca ohcat buoremus čovdosiid olles álbmogii.

 

Nuppi gažaldahkii vástida ges ná:

 – Buorre skuvla dahká ahte olbmot háliidit orrut min gielddas. Lean maid jurddašan mii dáhpáhuvašii jus gieldda čáhce ja kloáhkkavuogádat billahuvvat ruosti buolašin.

 

3. Mat leat du váibmoáššit?

– Mánáidgárddit, skuvla ja dearvvašvuohta. Doarvái oahpponeavvut lea alfa ja omega min mánáid ja nuoraid ovdáneapmái. Lea maid dehálaš addit lassi oahpu mánáidgárdeoahpaheddjiide ja oahpaheddjiide vai sii bissot virggiineaset. Sámi vuorrasiid maid galgá atnit árvvus, ja sii galget beassat eatnigielaset geavahit dearvvašvuođadivššus. Giella lea maid dehálaš vai ii oaččo boasttu dálkkodeami.

-Almmuhus-