-Almmuhus-
-Almmuhus-
OĐĐASAT – Áitagat ja háhtten lea dohkketmeahttun

 – Áitagat ja háhtten lea dohkketmeahttun

-

-

 – Lea áibbas dohkketmeahttun ahte nissonjođiheaddjit vásihit áitagiid ja háhttema Sámis, dadjá Bargiidbellodaga parlamentáralaš jođiheaddji Vibeke Larsen.

Bargiidbellodaga sámediggejoavkku parlamentáralaš jođiheaddji Vibeke Larsen lea hirpmástuvvan dainna mii dál lea boahtán ovdan Norgga Boazosápmelaččaid Riikkasearvvi (NBR) siskkáldas birrasa birra.

 – Áitagat ja háhtten nissoniid guovdu lea dovdomearkan dasa ahte gávdnojit miellaguottut maid ii vuordde gávdnat nu profeššunealla ealáhusorganisašuvnnas go NBR:s jagi 2015:s. Dađibahábut čájehit Ellinora vásáhusat ahte mis sámi servodagas lea vel veaháš bargu dahkat ovdal go mis lea dievas ovttadássásašvuohta ja ovttaárvosašvuohta sohkabeliid gaskkas, dadjá Vibeke Larsen.

 

– Heajos guottut nissoniidda

Ellinor Marita Jåma, gii lea nubbi nissonolmmoš jođiheaddjin NBR historjjás, lea dál jagi jođihan organisašuvnna.

Son muitalii NRK Ártna prográmmas maid son vásiha nuorra nissonjođiheaddjin boazodoalloorganisašuvnnas. NRK Sápmái lohká son vásihan sihke áitagiid, šláttardeami mas navdet su furrošan beassat jođiheaddjin, ja muđui heajos nissonoainnu siskkáldasat. Son lohká vásihan roavva áššiid, ja lohká ipmirdit manne eai leat eambbo nissonolbmot NBR:s.

 

Eambbosat vásihan

Maiddái eará nissonat NBR:s duođaštit NRK:ii ahte organisašuvnnas leat heajos guottut nissonolbmuide, nugo áitagat ja nissoniid hejošeapmi. Njunuš nissonat boazodoallopolitihkas Marit Kirsten Anti Gaup ja Mariann Wollmann Magga lohkaba goappašagat vásihan dákkáriid.

 

Rámida rabasvuođa

Bargiidbellodaga sámediggejoavku rámida Ellinor Jåma go rahpasit muitala iežas vásáhusaid birra, iige divtte duolbmat iežas jávohisvuhtii.

– Juste oainnusindahkamiin ja rabasvuođain dákkár mállet miellaguottuid birra, rahpá vejolašvuođaid jávkadit dákkár dearvvašmeahttun miellaguottuid, ja ásahit Sámi gos nissoniin ja dievdduin lea duohta ovttaárvosašvuohta. Mii sávvat Ellinor Jåmai lihku viidáset iežas doaimmas jođiheaddjin ovtta sámi deháleamos ealáhusorganisašuvnnain, loahpaha Vibeke Larsen preassadieđus.

 

 

-Almmuhus-