-Almmuhus-
-Almmuhus-
VALÁŠTALLAN  – Áhkuiguin ii ábut!

 – Áhkuiguin ii ábut!

-

-

Nu logai Elisabeth Edland go mánnodaga badjelaš diibmu 16 bođii mollii FL-500 beanagilvvus. Geahča video:

Nannestad nisu Elisabeth Edland lei diehttelasat váiban go lei vuodján 500 km garra biekka ja dálkkiid čađa. Muhto son lei hui movttet go ollii mollii, guokte beaivvi, njeallje beaivvi ja minuhta maŋŋel go vuoddjái Álttás iežas beatnagiiguin.

Máilmmemeašttir

Diibmu lei 16.16 mánnodaga go olli beanaráidduin Álttá guovddážii. Dál lea ge son maid máilmmimeašttir dán guhkkodaga beanavuodjimiin.  

– Mus lei duohta hállu vuoitit dán gilvvu. Ledjen gal čađat balus go lei nu dálki, ja sávven čađat ii go firtešii. Lei olu riedja maid go nu dálki lea, ja lean olu čeagŋán maŋágeahčen, muitala son. 

Muđui  láve su mielas orrut dego váivi go nohká mátki, muhto dál gal lea  hui duhtavaš go ii dárbbaš šat dálkkis vuodjit.

– Lean gal muđui hui duhtavaš vuodjimiin, dadjá Edland Ávvirii.

 

Finnmarksløpet deháleabbo

56-jahkásaš Elsabeth Edland ii leat gal easkkaálgi beanavuodjingilvvuin. Son lea birrasiid 40 jagi vuodján beatnagiiguin. Dát lei goalmmes go son vuittii Finnmarksløpet beanagilvvuid. Vuosttaš gearddi lei fárus 2006:s, muhto fertii gaskkalduhttit.  Jagiid 2007 ja 2011 lei son fárus, ja vuittii goappaš gerddiid. 

Vuoitu lea dieđusge máilmmimeašttirtittel, 33 000 Norgga ruvnno ja Polaris ATV mas lea árvu 95.000 kr.

 – Movt orru leat máilmmemeašttir?

 – Lean dál olahan dan mihtu ja dat orru hui buorre. In leat jurddašan nu olu dan máilmmimeašttir namahusa, muhto lei goit somá vuoitit Finnmarksløpet gilvvuid goalmmát gearddi. Dál áiggun vuolgit basadit ja vuoiŋŋastit, dadjá son Ávvirii.

 

Leavvajogas juo ovddemus

Leavvajogas Edland sihkkarastii buori gaskka gilvaleaddjái Hilde Askildai, geainna lei njunnošis.

Hilde Askildt bođii nubbin, diibmu 16.41. Silbavuoiti maid lohká leamaš oalle garra mátki.

 – Garraseamos gaska gal lei bajás Jotkii. Go dálkkáskii vel albmaládje dalle, de gal orui oalle vearrái. Garra biegga lei lossat sihke beatnagiidda ja vuoddjái, dajai son go lei ollen mollii.

Ollu olbmot ledje boahtán Álttá guovddážii váldit vuostá FL-500 vuitiid odne birrasiid diibmu 16, vaikko lei suhkkes borga gaskkohagaid.

 

 

- Advertisement -
-Almmuhus-